Bas múftı Islam ınstıtýtynyń dırektorymen kezdesti

QMDB Tóraǵasy, Bas múftı Naýryzbaı qajy Taǵanuly Almaty qalasyna jasaǵan jumys sapary barysynda Respýblıkalyq ımamdardyń bilimin jetildirý ıslam ınstıtýtynyń dırektory Serikbaı qajy Orazben kezdesti.

Júzdesý barysynda oqý ordasynyń jumys esebi men ınstıtýttyń alda atqarar jumystarynyń jospary tyńdaldy. «Pandemııa jaǵdaıy barlyq salaǵa áserin tıgizdi. Sonyń ishinde bilim ordalaryna da áser etti. Alaıda bosańsýǵa esh negiz joq. Onlaın oqytýdyń barlyq amaly jasaldy. Instıtýt ustazdary da jańa zamannyń múmkindikterine beıimdeldi» dep atap ótti Serikbaı qajy Oraz.

Bas múftı Naýryzbaı qajy Taǵanuly ımamdardyń bilimin jetildirý kún tártibindegi basty talap ekenin aıta kele, «Islam ınstıtýtynyń oqý baǵdarlamasy zaman talabyna saı jetilip otyrýy kerek. Imamdardy tek dinı bilimmen shektemeı, ǵylymı jańalyqtar, aqparattyq tehnologııalar, tarıh men psıhologııany jetik biletin jan-jaqty maman etip daıarlaýǵa kúsh salýymyz qajet» dedi.