Bas múftı ımamdarǵa pandemııa kezinde sanıtarlyq talaptardy qatań saqtaýdy tapsyrdy (FOTO)
Búgin Bas múftı Naýryzbaı qajy Taǵanulynyń tóraǵalyǵymen QMDB-nyń oblystardaǵy bas ımamdarynyń qatysýymen onlaın rejımdegi jıyn ótti. Jıynǵa naıb múftı Ershat Ońǵarov jáne QMDB ókildikteriniń bas ımamdary qatysty.
Onlaın jıynda oblystyq ókildikterge júktelgen tapsyrmalardyń oryndalýy pysyqtaldy. Jıynda negizinen bes másele qaraldy. Atap aıtqanda, pandemııa kezindegi dinı rásimderdi sanıtarlyq talaptarǵa saı uıymdastyrý; bıylǵy túlekterdi jumysqa ornalastyrý jáne jańa oqý jylyna talapkerler daıyndaý; onlaın ýaǵyz-nasıhat pen Quran hatym oqýdy jandandyrý; aldaǵy Qurban aıt merekesine daıyndyq jasaý; halyqty juqpaly aýrýdan saqtandyrý maqsatynda onlaın sadaqa berýdi qolǵa alý jaıly tapsyrmalar berildi.
Bas múftı sondaı-aq óńir ımamdaryna sanıtarlyq talaptardy qatań saqtaýdy, halyqqa psıhologııalyq qoldaý bildirip, kóbirek ıstıǵfar, salaýat aıtý jáne sadaqa nıetimen qurbandyq shalýdy uıymdastyrýdy tapsyrdy.
«El basyna qaýip tóngen osyndaı syn kezeńde Alladan duǵa tilep, qurban shalýdyń mańyzy zor. Qazaqta qýańshylyq bolyp, qaýip-qaterge dýshar bolǵanda qurbandyq shalyp, Alladan duǵa tileıtin jaqsy dástúr bar. Máselen, Shámis Qumarulynyń «Er Jánibek» tarıhı romanynda halyqtyń Alladan jeńis suraý maqsatynda qurban shalǵany jazylǵan. Demek Alladan raqym, medet, shıpa suraý maqsatynda qurban shalyp, duǵa tileýdiń artyǵy joq. Bárin beretin – Alla Taǵala. Sondyqtan erteń saǵat 11:00-de elimizdiń barlyq aımaǵynda qurban shalyp, Alladan kóbirek duǵa tileıik» dedi Naýryzbaı qajy Taǵanuly.
Jıyn sońynda QMDB Tóraǵasy «Elimizdi beıbit mekenge aınaldyryp, indetten qutqara kór» deı kele, memleketimizdiń, ımamdar men jamaǵattyń, aýyryp jatqan jurtshylyqtyń amandyǵy úshin Alladan shıpa surap, duǵa jasady.
