BAS MÚFTI I HALYQARALYQ QURAN JARYSYNYŃ JEŃIMPAZDARYN MARAPATTADY (FOTO)

Búgin Qazaqstan musylmandary dinı basqarmasy Qazaqstan Respýblıkasynyń ulttyq merekesi – Respýblıka kúnine oraı uıymdastyrǵan I halyqaralyq Quran jarysy óz máresine jetti. Jarys jeńimpazdaryn marapattaý rásimine Bas múftı Naýryzbaı qajy Taǵanuly arnaıy qatysty.

Halyqaralyq jarysty qorytyndylaǵan QMDB Tóraǵasy aýqymdy sharany uıymdastyrýǵa atsalysqan barsha din janashyrlaryna, qatysýshy qarılarǵa, qazylar alqasyna alǵysyn bildirdi.

«Allanyń qalaýymen, barshańyzdyń janashyrlyqpen jasaǵan qoldaýlaryńyzben Qazaq elinde tuńǵysh ret ulttyq merekemiz – Respýblıka kúnine oraı ótken I halyqaralyq Quran jarysyn joǵary deńgeıde uıymdastyrdyq. Allaǵa sansyz shúkirler, maqtaý men madaqtar bolsyn.

«Qazaq halqynda «Myńnan tulpar, júzden júırik shyǵady» degen naqyl sóz bar. Meniń oıymsha, sizder álemdegi eń úzdik tańdaýly qarısyzdar. Osy rette laıyqty júldege ıe bolǵan barsha qarılardy quttyqtaımyn. Árqaısyńyz marapatqa laıyqsyzdar.Rasynda, qarı úsh jaǵdaıda, ıaǵnı jattaǵan Qurandy ustazyna tapsyrý, taraýyq namazynda ımamdyq etý, osyndaı jarystarǵa qatysý arqyly Quranyn pysyqtaı túsedi. Sizder eki kúnge sozylǵan halyqaralyq Quran jarysynda Allanyń sózin taǵy da pysyqtaı túsip, jeńiske jettińizder. Alla Taǵala barshamyzǵa Quran aıattaryn tolyq jattap, oǵan amal etýdi jazǵaı. Qurannyń shapaǵatyna bólenip, eki dúnıe baqytyna keneleıik. Ámın» dedi Bas múftı.

Budan keıin QMDB Tóraǵasy Naýryzbaı qajy Taǵanuly I halyqaralyq Quran jarysyna qazylyq jasaǵan qarı-ustazdar – Osman Sahın (Túrkııa), Jahongır Nematov (Ózbekstan), Maher Faramaýı (Mysyr Arab Respýblıkasy), Abdýlla Álı Álhashmı (Birikken Arab Ámiriligi) jáne ádilqazylar alqasynyń tóraǵasy Ersin Ámirege alǵys hat tabystady.

Al qazylar alqasynyń sheshimimen elimizde tuńǵysh ret ótken Quran jarysynyń jeńimpazdary tómendegideı:

I oryn ($20 000) – Ilıas Hajrı (Marokko Koroldigi) 

II oryn ($ 15 000) – Týrpal-Alı Sadykov (Reseı Federatsııasynyń Sheshen Respýblıkasy)

III oryn ($ 7 000) – Malek Abdýlla Albadın (Lıvııa memleketi)

III oryn ($ 7 000) – Saǵd Salım (Aljır Halyqtyq Demokratııalyq Respýblıkasy)

IV oryn ($ 5 000) – Abdýrahman Faraj Hafız Baraǵı (Mysyr Arab Respýblıkasy)

V oryn ($ 3 000) – Muhammed Adıb ben Ahmet Razanı (Malaızııa)

Aıta keteıik, Quran jarysy múftııattyń tól «Munara TV» telearnasynan, «Mýftııat QMDB» YouTube arnasynan, Dinı basqarmanyń @muftiyatkz resmı ınstagram-paraqshasynan tikeleı Efır arqyly kórsetildi.

​Derekkóz: QMDB Baspasóz qyzmeti

Источник: Aidos