Bas múftı Etno-mádenı ortalyqtardyń basshylarymen kezdesti (FOTO)
QMDB tóraǵasy, Bas múftı Naýryzbaı qajy Taǵanuly Rýhanı kelisim kúnine oraı Qazaqstan halyqtary Assambleıasy múshelerimen kezdesti.
Aldymen Dinı basqarmaǵa arnaıy kelgen elordadaǵy Etno-mádenı ortalyqtardyń basshylaryna «Múftııat tynysymen» tanystyratyn beınerolık kórsetildi. Kezdesý barysynda ulttar tatýlyǵy, rýhanı sabaqtastyq jaıynda sóz qozǵaldy.
Kezdesýde Bas múftı Naýryzbaı qajy Taǵanuly: «Rasynda, Allanyń aldynda súıkimdi adamdar, olar – eldi birlikke shaqyrǵandar, alaýyzdyqqa jol bermegender. Qasıetti Quran Kárimniń «Hýjýrat» súresiniń 13 aıatynda: «Ýa, adamdar! Negizinde, Biz senderdi bir er jáne bir áıelden jarattyq, ári senderdi bir-birlerińdi tanyp, bilýleriń úshin halyqtar men rýlar ettik. Anyǵynda, Allanyń aldyndaǵy senderdiń eń qurmettileriń – taqýalaryń», – delingen.
Búkil adamzat balasynyń ulttar bolyp, qaýymdasyp ómir súrýi, bir-birinen erekshelep jaratylýy – Jaratýshy Alla Taǵalanyń danalyǵy, meıirimi men nyǵmeti. Saıyn dalany meken etken túrli ult ókilderi salt-dástúrin, ádebıeti men mádenıetin damytýǵa erikti.
Din memlekette, qoǵamda tynyshtyq, ádildik bolýyn kózdeıdi. Adamdy soǵan tárbıeleıdi. Qazaqstan musylmandary dinı basqarmasy da osyndaı uly murattarǵa umtylyp, jurtty izgilikke úndep qana qoımaı, birlik pen berekeniń nyǵmetin udaıy ulyqtap keledi. Óıtkeni, búkil adamzatqa túsirilgen qasıetti Quranda Alla Taǵala: «Bólinbeńder», – dep buıyrǵan. Paıǵambarymyz Muhammed (oǵan Allanyń salaýaty men sálemi bolsyn) dinı ymyraǵa kelýdi buıyrǵan» dep atap ótti.
Sondaı-aq qonaqtar Dinı basqarma ǵımaratyn aralap, din qyzmetkerleriniń jumysymen tanysty. Óz kezeginde Assambleıa músheleri de Bas múftıge alǵystaryn aıtyp, tili basqa bolsa da, tilegi bir ekendikterin jetkizdi. Kezdesý sońynda Dinı basqarma atynan qonaqtarǵa kádesyı taratyldy.
