Bas múftı Erjan qajymen kezdesti (FOTO)

Alǵashqy jumys saparyn Almatydan bastaǵan QMDB Tóraǵasy, Bas múftı Naýryzbaı qajy Taǵanuly Dinı basqarmanyń burynǵy tóraǵasy, Nur-Múbarak ýnıversıteti rektorynyń keńesshisi Erjan qajy Malǵajyulymen arnaıy kezdesti.

Júzdesý barysynda Dinı basqarmanyń bıylǵy 30 jyldyq mereıtoıynda atqarylatyn ıgi sharalardyń birsypyrasy tanystyryldy. Erjan qajy Malǵajyuly oıǵa alǵan jumystarǵa rızashylyǵyn bildirip, óziniń aǵalyq keńesin qosty.

«Elimizdegi musylman jamaǵatynyń talaby kúshti. Sondyqtan ımamdarymyzdyń bilimi soǵan saı bolý kerek. Imamdarǵa qoıylar mindet te – joǵary. Dindi nasıhattaý – eldik, ortaq jumys. Alaıda birinshi orynda baýyrmaldyq qasıet turýy tıis. «Jas kelse – iske» deıdi. Ózińe árqashan da tilektespin. Alla osy kezeńdi damytýǵa laıyq dep tanypty. Endigi qolǵa alar isteriń tabysty bolsyn» dedi Erjan qajy Malǵajyuly.

Sondaı-aq Bas múftıdiń usynysymen qurylatyn Aqsaqaldar alqasy quramyna Erjan qajy da kiretinin málimdedi. Kezdesý sońynda aldaǵy ýaqytta Dinı basqarma aıasynda atqarylar ortaq sharýalarǵa úles qosatynyn aıtty.

Óz kezeginde Bas múftı Naýryzbaı qajy Taǵanuly Erjan Malǵajyulynyń asyl dinimizge, onyń ishinde múftııatqa sińirgen eńbegin erekshe atap ótip, syı-qurmet retinde ıyǵyna shapan jaýyp, Dinı basqarmanyń estelik buıymyn tabystady.