BAS MÚFTI ELORDADAǴY MÁÝLIT KEShINDE NASIHAT AITTY (FOTO)
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly elordadaǵy Beıbitshilik pen kelisim saraıynda ótken «Dinim – dińgegim, dástúrim – qazynam» rýhanı máýlit keshine qatysyp, jamaǵatqa ýaǵyz aıtty.
Aldymen rýhanı kesh Quran aıattary jáne Máýlit jyryn oqýmen bastalyp, jınalǵan kórermen tike turyp Paıǵambarymyzǵa salaýat pen sálem joldady. Sondaı-aq QMDB Tóraǵasy Naýryzbaı qajy Taǵanuly el amandyǵy men tynyshtyǵy úshin duǵa jasady.
Budan keıin Bas múftı ardaqty Paıǵambarymyzdyń (oǵan Allanyń salaýaty men sálemi bolsyn) ónegeli ómiri jóninde toqtalyp: «Adamzattyń ardaq tutar ustazy, jer betine raqym etip jiberilgen ardaqty Paıǵambarymyz Muhammed Mustafa (oǵan Allanyń salaýaty men sálemi bolsyn) barsha adamzat úshin kórkem minez ben ádeptiń, joǵary adamı qundylyqtardyń kemel úlgisi bola bildi. Alla Taǵala qasıetti Qurandaǵy «Ahzab» súresiniń 21-aıatynda: «Rasynda sender úshin Alla Elshisiniń boıynda kórkem úlgi-ónegeler bar», – dep aıtylǵan. Demek, Musylmandyqty durys ustanyp, din úkimderin laıyqty deńgeıde atqarýdy qalaǵan árbir jan Alla Elshisiniń (oǵan Allanyń salaýaty men sálemi bolsyn) aıtqandaryna baǵynyp, isin úlgi ete bilýi qajet.
Ardaqty Paıǵambarymyz Muhammed Mustafanyń (oǵan Allanyń salaýaty men sálemi bolsyn) bizder úshin úlgi retinde kórsetken mańyzdy isteriniń biri – ár ult óziniń dástúrin, ádet-ǵurpyn qurmetteý. Óıtkeni Alla Elshisi (oǵan Allanyń salaýaty men sálemi bolsyn) arab halqynyń Islamǵa deıingi dáýirdegi sharıǵatqa qaıshy kelmegen ádet-ǵurypynyń sol qalpynda qoldanylýyna tyıym salǵan joq. Qaıta adamdar arasynda qoldanylýyna mán berdi.
Tipti Hanafı mazhabynda sharıǵat erejesine saı kelgen ǵuryp sharıǵı dálel retinde qarastyrylady. Bul turǵyda ǵalymdarymyz qasıetti Qurannyń «Aǵraf» súresi, 199-aıatyndaǵy: «Ǵafý jolyn usta, ǵuryppen ámir et jáne nadandardan teris aınal», – degen aıatty alǵa tartqan» dedi.
Aıta keteıik, kesh barysynda teatr ártisteriniń qatysýymen din men dástúrimizdi dáripteıtin maǵynaly, áserli qoıylymdar sahnalanyp, qazaq Estradasy men dástúrli án óneri juldyzdary Paıǵambarymyzǵa arnalǵan jáne jas pen kárige nasıhat bolatyn jyr-termelerdi oryndady. Rýhanı is-shara sońynda bıletten túsken qarajat «Máýlit syıy» retinde talantty, erekshe daryny jáne bilimimen kózge túsken elordalyq oqýshylar men stýdentterge tabystaldy. Sonymen qatar, kórermender arasynda utys oınatylyp, Astana qalasynyń turǵynyna umra qajylyǵyna joldama buıyrdy. Erekshe atap ótetin jaıt, kesh qonaqtarynyń Paıǵambarymyzdyń (oǵan Allanyń salaýaty men sálemi bolsyn) ómir jolymen VR tehnologııasy arqyly tanysýyna múmkindik berildi.
