BAS MÚFTI ELORDADA ǴALYMDARMEN KEZDESTI (FOTO)
Búgin Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly elordadaǵy L.N.Gýmılev atyndaǵy Eýrazııa ulttyq ýnıversıtetine arnaıy baryp, bilim ordasynyń rektory jáne oqytýshy ǵalymdarmen kezdesti.
Aldymen Bas múftı joǵary oqý ornyna 2001 jyly qoıylǵan Kúltegin eskertkishiniń kóshirmesin tamashalap, «Jazý tarıhy» mýzeıindegi jádigerlermen tanysty. Budan keıin ýnıversıtettiń professor-ǵalymdary, oqytýshy ustazdarymen birge jıynǵa qatysty. Basqosýda QMDB Tóraǵasy baıandama jasap, asyl dinimizdiń qazaq dalasyna kelýi jóninde maǵlumat berdi.
«Ózderińiz bilesizder, bizdiń qazaq halqy 1270 jyldan beri Islam dinin ustanyp, óziniń rýhanı tiregine aınaldyryp keledi. Qarahandyqtar bıliginiń negizin qalaǵan Satuq Boǵra han 955 jyly Islam dinin qabyldap, diniń taralýyna jaǵdaı jasasa, 960 jyly Musa qaǵannyń kezinde Islam memlekettik din bolyp jarııalandy. Sol kezden bastap Máýerannahr aımaǵy ǵylym men mádenıettiń ortalyǵyna aınaldy. Islamnyń kelýi arqyly Ortalyq Azııada bilim-ǵylym qanat jaıdy. Meshit-medreseler ashylyp, bilimniń taralýyna jaǵdaı jasaldy. Medreselerde din ǵylymymen qatar fılologııa, logıka, matematıka, astronomııa, medıtsına, fılosofııa sekildi ǵylym salalary oqytyldy.
Ortalyq Azııadan Ábý Nasyr ál-Farabı, Ahmet Iasaýı, Júsip Balasaǵun, Hýsamýddın as-Syǵanaqı sekildi sekildi ǵalymdar shyqty. Farabı, Bırýnı, Ibn Sına, Horezmı sekildi ǵulamalar shyǵyp, órkenıet tarıhyndaǵy óz ornyn aıshyqtady. Olar Haq dinge súıene otyryp, ǵalamnyń tylsym qupııasyn ashty. Olardyń ashqan jańalyqtary musylman álemin nurlandyryp, sáýlelendire tústi» dedi Bas múftı.
Óz kezeginde bilim oshaǵynyń rektory Erlan Báttashuly Eýrazııa ýnıversıtetinde Dintaný kafedrasy bar ekenin aıtyp, Qazaqstan musylmandary dinı basqarmasymen birlesip jumys isteýge ázir ekenin jetkizdi. Sondaı-aq ýnıversıtet basshysy QMDB Tóraǵasy Naýryzbaı qajy Taǵanulyn el birligi men rýhanııatyna qosqan úlesi úshin oqý ordasynyń joǵary marapaty – «Kúltegin» medalimen marapattady.
Budan bólek ýnıversıtettiń oqytýshylar quramy Bas múftımen Islam dininiń qazaq dalasyna qanat jaıýy, ulttyq qundylyqtar men salt-dástúr jóninde pikir almasty.
