Bas múftı Elorda jurtshylyǵyna aýyzashar berdi (FOTO+VIDEO)

Respýblıkalyq «Áziret Sultan» meshitinde QMDB tóraǵasy, Bas múftı Serikbaı qajy Orazdyń atynan aýyzashar berilip, 600-ge jýyq jan berekeli dastarhannyń qurmetti qonaǵy boldy. Saýapty keshke el tizginin ustaǵan azamattar men zııaly qaýym ókilderi, aqyn-jazýshylar, musylman memleketiniń elshileri, óner jáne qoǵam qaıratkerleri, elimizdegi BAQ jáne telearna tóraǵalary, Qarttar úıi men Balalar úıi, Zaǵıptar ortalyǵynan arnaıy shaqyrylǵan qurmetti qonaqtar qatysty.

Aqsham ýaqyty kirgenin súıinshilegen azan daýysymen bastalǵan berekeli keshtiń shymyldyǵy Bas múftı Serikbaı qajy Orazdyń batasymen ashyldy. QMDB tóraǵasy Serikbaı Satybaldyuly jamaǵatqa ýaǵyz aıtyp, izgi tilegin arnady.

Qasıetti ramazan aıynyń qadirin nasıhattaǵan berekeli kesh barysynda qonaqtar ýaǵyz-nasıhatqa qanyǵyp, taǵylymdy terme tyńdap, qazaqy qara óleńge qulaq túrdi. Meıramhana ishine arnaıy qoıylǵan LED Ekrandardan QMDB-ǵa qarasty «Hıkmet» teleradıostýdııasy ázirlegen ramazan aıy jaıyndaǵy beınerolıkter kórsetilip, qonaqtardyń bul keshten rýhanı azyqtanyp qaıtýyna da septigin tıgizdi.

Berekeli dastarhan basynda bas qosqan jamaǵat aldynda sóz alǵan halqymyzdyń kórnekti jazýshylary – Ákim Tarazı men Tólen Ábdik, Túrkııanyń elimizdegi Tótenshe jáne Ókiletti elshisi Nevzat Ýıanyk jınalǵan qaýymdy qasıetti aımen quttyqtap, ıgi tilekterin jetkizdi. Sonymen qatar QMDB tóraǵasynyń Birinshi orynbasary Naýryzbaı qajy Taǵanuly men belgili ǵalym Ǵarıfolla Esim júrekjardy quttyqtaý sózderin joldady.

Belgili aqyn Serikzat Dúısenǵazy «Ramazanmen qoshtasý» óleńin oqyp, jamaǵatty izgilikke úndedi. Terme-tolǵaýlar da oryndaldy.

Rýhanı keshte qasıetti Quran aıattary oqylyp, qarııa batasymen qaıyrylǵan aýyzashar dastarhany shaqyrylǵan qonaqtardyń shynaıy alǵysymen aıaqtaldy.

Sýretter toptamasyn «FOTOGALEREIa» aıdarynan kóre alasyzdar!