Bas múftı din qyzmetkerlerine memlekettik tildi bilýdi mindettedi

Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly QMDB-ǵa qarasty ımam-ustazdardyń laýazymdyq mindetin taǵy bir jańa mindetpen tolyqtyrdy.

Bas múftı buıryǵy boıynsha QMDB qyzmetkerleri, respýblıkalyq mańyzy bar (Nur-Sultan, Almaty, Shymkent) qalalardyń, oblystardyń bas ımamdary men naıb ımamdary, qala, aýdan, aýyl ımamdary men naıb ımamdary jáne ustaz, azanshy, moldalardyń memlekettik til – qazaq tilin bilýi mindetteldi. Odan bólek resmı til – orys jáne Quran tili – arab tilin bilýi qajet.

Bizdiń elimiz Qazaqstan – kópultty memleket. Qazirgi tańda QMDB-nyń ımam-ustazdary qatarynda ózge ult ókilderi de bar. Sondyqtan olardyń meshit jamaǵatymen altyn kópir ornatýy úshin memlekettik tildi bilýi mańyzdy.