BAS MÚFTI DIN MEN DÁSTÚR JÓNINDE JUMA ÝAǴYZYN AITTY (FOTO)

Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly elordadaǵy Respýblıkalyq bas meshitte jamaǵatqa juma ýaǵyzyn aıtty.

Bas múftı «Din men dástúr – egiz uǵym» taqyrybynda nasıhat aıtyp, asyl dinimiz ben ata-baba salt-dástúriniń bite qaınasqan tustaryna keńinen toqtaldy.

«Qazaq halqynyń Islam dinimen tanys bolǵanyna myń eki júz jyldan astam ýaqyt ótti. Sodan beri salt-sanasy, ádet-ǵurpy, ádebıeti men mádenıeti musylmandyqqa beıimdelip, aqyrynda Islam dini halyq dilimen bite qaınasyp, ulttyq bolmystyń ajyramas bólgine aınaldy.          Dinimiz ben dástúrimiz búkil ómirimizdi qamtıtyndyqtan bul eki qundylyǵymyz jaıynda uzaq aıtýǵa bolady.  

Túrki taıpalary, sonyń ishinde qazaq halqy VIII ǵasyrda, ıaǵnı ıslam dininiń kelý kezeńinen bastap, Allanyń ámirlerine boısuna bastady. Islam dini qazaq halqynyń rýhanı tiregine aınaldy. Osylaısha ıslamdy sanaly túrde qabyldaǵan ata-babalarymyz damýdyń jańa satysyna kóterildi. Jazýshy Muhtar Áýezovtyń: «Túrki halyqtary musylmandyqty qabyldaǵan soń bir qyrdan asyp ketkendeı boldy» degen sózinde úlken mán bar. Dini men dástúrin  ushtastyrǵan babalarymyz ǵasyrdan ǵasyrǵa jalǵasyp osy eki qundylyqty ómirlik jol basshy etti. «Atadan bala týsaıshy, ata jolyn qýsaıshy» dep bolashaq urpaqqa babalar salǵan sara joldy ustanyp, salt-dástúrimizdi ardaqtaýǵa shaqyrdy» dedi QMDB Tóraǵasy.

Juma namazynan soń Bas múftı meshit jamaǵatymen birge el amandyǵy men tynyshtyǵy úshin duǵa jasady.

​