Bas múftı burynǵy naıb múftıdiń otbasyna kóńil aıtý jedelhatyn joldady

Qazaqstan musylmandary dinı basqarmasynyń tóraǵasy, Bas múftı Serikbaı qajy Oraz burynǵy naıb múftı Zaınılabıddın Máýlenulynyń qazasyna baılanysty kóńil aıtý jedelhatyn joldady.

«Ardaqty aǵamyz, janashyr baýyrymyz, ustaz, ımam Ahmedov Zaınılabıddın Máýlenulynyń qazasy týraly qaraly habar meniń de qabyrǵamdy qaıystyrdy. Imany salamat bolǵaı. Marqumnyń otbasyna, týǵan-týystaryna, barsha din qyzmetkerlerine ózimniń jáne Qazaqstan musylmandary dinı basqarmasynyń atynan qaıǵyra kóńil aıtamyn. Zaınılabıddın Máýlenuly Allanyń bergen ólsheýli ómiriniń 30 jyldan astam ýaqytyn ımamdyq qyzmetke baǵyshtady. Osy jyldar ishinde Qazaqstan musylmandary dinı basqarmasynyń tóraǵa orynbasary, naıb múftı, Ońtústik, Batys Qazaqstan oblystarynda ókil ımam qyzmetin atqardy. Ol asyl dinimizdiń janashyry edi. Kópke úlgi laıyqty ustaz boldy. Alla Taǵala marqum Zaınılabıddın Máýlenulyn meıirimine bólep, janyn jánnattyq etkeı. Qazanyń arty qaıyrly bolǵaı. Jaratqan Jabbar Iemiz artynda qalǵan urpaǵyna jar bolsyn dep tileımiz. Ámın», – delingen Bas múftıdiń jedelhatynda.​