Bas múftı Beıbarys aýylynda «Qasym han» meshitin saltanatty jaǵdaıda ashty (FOTO)
Atyraý oblysy, Mahambet aýdany, Beıbarys aýylynda qasıetti juma kúni saltanatty jaǵdaıda ashylǵan meshittiń syıymdylyǵy 300 adamǵa shaqtalǵan.
Meshittiń ashylý rásimine arnaıy qatysqan Bas múftı Naýryzbaı qajy Taǵanuly qulshylyq ordasy – tárbıeniń, rýhanııattyń mekeni ekendigin atap ótti.
«Álbette, Allaǵa jáne aqyretke shynaıy ıman keltirgender meshitti kórkeıtedi. Meshittiń baılyǵy onyń jamaǵatymen ólshenedi. Bes ýaqyt azan shaqyrylǵan jerde bereke bolady. Alla Taǵala sol qut-berekeni aýyldaryńyzǵa násip etkeı» dedi Bas múftı Naýryzbaı qajy Taǵanuly.
Meshittiń ashylý rásimi barysynda Bas múftı Naýryzbaı qajy Taǵanuly bıyl Qazaqstan musylmandary dinı basqarmasynyń qurylǵanyna 30 jyl tolyp otyrǵanyn da tilge tıek etti.
«Osynaý mereıli data aıasynda múftııat tarıhymyzda ótken han, sultan, áýlıe-ámbıelerdiń atyn meshitterge berýdi uıǵardyq. Qasym han babamyz qazaq halqynyń eldiginiń bastaýynda turǵan tarıhı tulǵa. Biz babamyzǵa meshit atyn berý arqyly, jas urpaqqa tarıhı tulǵalarymyzdyń esimin dáriptep otyrmyz» dedi Naýryzbaı qajy Taǵanuly.
Sonymen birge, QMDB tóraǵasy meshittiń turǵyzylýyna atsalysqan barsha aýyl jurtshylyǵyna rızashylyǵyn jetkizip, meshittiń qurylysyna atsalysqan jergilikti azamat Turar Ǵalymjanuly bastaǵan bir top aýyl turǵyndaryna alǵys hat tabys etti.
Sondaı aq, Bas múftı Naýryzbaı qajy Taǵanuly jurtshylyq aldynda «Qasym han» meshitiniń ımamy Baǵdat Kereevti tanystyrdy.
Qulshylyq úıi erlerge jáne áıelderge arnalǵan namaz oqý zaldarynan, Quran oqý bólmesinen jáne kitaphanadan turady. Meshit janynda sonymen birge, ashana, ımam úıi, dárethana bar.
