Bas múftı «Áziret Sultan» meshitiniń Ramazan kezindegi jaǵdaıymen tanysty (FOTO)

Búgin QMDB tóraǵasy, Bas múftı Naýryzbaı qajy Taǵanuly respýblıkalyq «Áziret Sultan» meshitine kelip, qulshylyq ordasynyń Ramazan kezindegi jaı-kúıimen tanysty. Karantın rejımine oraı iske qosylǵan onlaın dárister men tikeleı kórsetilim, Quran hatym jobalarymen tanysyp, Bas meshittegi basqa da is-sharalar jaıly pysyqtady.

Sondaı-aq, meshit bas ımamy Erbolat Júsipov «Ramazan shýaǵy» atty tegin aýyzashar paketterin taratý men qaıyrymdylyq sharalaryn uıymdastyrý jumystary jaıly maǵlumat berip, qazirgi tańda atalmysh sharalarynyń aýqymy keńeıe túskenin jetkizdi. Ramazan aıy bastalysymen iske qosylǵan «Ramazan shýaǵy» atty tegin aýyzashar paketteri keshe «Sharapat» eriktiler ortalyǵynyń kómegimen 1 000-ǵa jýyq adamǵa taratylǵan bolatyn.

Aıta keteıik, qazirgi tańda qasıetti Ramazan aıynyń qurmetine oraı «Áziret Sultan» meshitinde kúndelikti onlaın dárister turaqty túrde ótkizilip keledi. Buǵan qosa, Bas múftı bastamasy negizinde «Onlaın Quran hatym» jáne «Batamenen el kógerer» atty jobalar iske qosylǵan bolatyn.