Bas múftı aımaqtyq ımamdar forýmyna quttyqtaý joldady (FOTO)

Qazaqstan musylmandary dinı basqarmasynyń tóraǵasy Serikbaı qajy Oraz Atyraý qalasynda ótken aımaqtyq ımamdar forýmyna quttyqtaý hat joldady.

Bas múftıdiń ıgi tilegin QMDB baspasóz hatshysy Aǵabek Qonarbaıuly oqyp berdi.

"Dál osy sátte ótip jatqan aımaqtyq ımamdar forýmy barshańyzdy eldiń ıgiligi men izgiligi, birligi men berekesi syndy ortaq múddege toptastyryp, jaqsylyqqa jumyldyryp otyr. Búgingi basqosý berekeli bolsyn!

Bul - 23 qazanda arqa tósinde, Elorda tórinde ótken III respýblıkalyq ımamdar forýmynyń Atyraý oblysynda jalǵasyn tapqan berekeli jıyn. Aımaqtyq ımamdar forýmynyń sátti ótýine tilektestigimdi bildiremin. 

Rasynda, Atyraý - "Isataı - basshy, men - qosshy", - dep jyrǵa qosqan keshegi Mahambet syndy aqyndar men batyrlardyń, jyraýlar men jazýshylardyń izi qalǵan kıeli jer. Baq daryp, qut qonǵan osynaý Atyraý oblysynyń bas ımamy etip dinı salada talaı jyl eńbek etken, bilimi men tájirıbesi ózara úılesken Altynbek Utyshan uldaryńyzdy taǵaıyndadym. Bolǵanǵa bolysyp, birlikke uıysyp, eldiń erteńi úshin qyzmet etý - Siz ben bizge úlken amanat. Jańa bas ımamnyń ıgi bastamalaryn qoldap, izgi istiń basy-qasynda bolatyndaryńyzǵa senemin. Alla razy bolsyn!"- delingen Bas múftı quttyqtaý hatynda.

Forýmǵa Atyraý oblysynyń bas ımamy Altynbek Utyshanuly, óńir ımamdary, zııaly qaýym ókilderi, jalpy 100-den astam adam qatysty.