Bas múftı Áıel-qyzdar sektorynyń aımaqtaǵy ókilderimen suhbattasty (FOTO)

Búgin Bas múftı Serikbaı qajy Oraz QMDB janyndaǵy Áıel-qyzdar sektorynyń aımaqtaǵy ókilderimen kezdesti.

Kezdesýde sektordyń jumysy, bala tárbıesiniń musylmandyq bastaýlary, destrýktıvti aǵymnyń arbaýyna ilesken jastarǵa túsindirý sharalaryn júrgizý, jamaǵatqa bólinbeý, dostyq, adamgershilik, ózara kelisim syndy qundylyqtardy nasıhattaý, t.b. máseleler sóz boldy.

«Dinı basqarmanyń negizgi jumys baǵytynyń biri – halyqty dinı aǵartý. Dinı bilimi taıaz adam kóp jaǵdaıda jalań urandar men jalǵan ýádelerge tez sengish keledi. Ustaz adamnyń ishki álemine enýi kerek. Sonda ǵana ony tolǵandyrǵan saýaldaryna jaýap beredi. Dinı saýat ashý baǵytyndaǵy jumysty udaıy jetildirip, jandandyryp otyrý kerek», – dep atap ótti Serikbaı qajy Satybaldyuly.