Bas múftı Astanada turmysy tómen otbasylarǵa aýyzashar berdi (FOTO)

Búgin QMDB tóraǵasy, Bas múftı Serikbaı qajy Oraz Astana qalasyndaǵy respýblıkalyq «Áziret Sultan» meshitinde aýyzashar berdi. 800 janǵa arnalyp jaıylǵan aq dastarhan basyna Elordamyzdaǵy turmysy tómen otbasylar, Qarttar úıiniń ardager aqsaqaldary men Balalar úıiniń tárbıelenýshileri, túrli qoǵamdyq uıym músheleri, ustazdar qaýymy men jýrnalıster, zııaly qaýym ókilderi men musylman memleketteriniń elshileri jáne QMDB qyzmetkerleri men meshit jamaǵaty shaqyrylyp, Bas múftımen birge aýyz ashyp, berekeli otyrysqa qatysyp qaıtty.

Berekeli Ramazan dastarhany aıasynda qasıetti Quran aıattary oqylyp, din men dástúr sabaqtastyǵyn dáriptegen taǵylymdy ýaǵyzdar aıtyldy. Bas múftı Serikbaı qajy Oraz búgingi aýyzashar dastarhanyna jıylǵan jamaǵatqa óz alǵysyn bildirip, Alla Taǵala quzyrynda dárejesi erekshe bolǵan qasıetti Ramazan aıymen quttyqtap ótti. Múbárak aıdyń kúnin orazamen, túnin taraýıhpen ádiptegen ımandy jamaǵatpen búgin bir dastarhan basynda bas qosyp, berekeli aýyzashar ótkizýdi násip etken Jaratýshy Allaǵa sansyz shúkirligin jetkizdi.

Aýyzashar dastarhanyna jıylǵan jamaǵatqa qazaqy qara óleńnen de sybaǵa tartylyp, taǵylymy tereń terme de oryndaldy. «Jaqsymen ótkizgen jarty saǵat, jamannyń ótip ketken ǵumyryndaı» dep atam qazaq aıtpaqshy, elimizdiń Bas meshitindegi búgingi aýyzashar dastarhany jamaǵatty rýhanı nárlendirip, qasıetti Ramazan aıynyń qadirin arttyra tústi.