Bas múftı Aqtóbe oblysynyń ákimi Berdibek Saparbaevpen kezdesti (FOTO)

Qazaqstan musylmandary dinı basqarmasynyń tóraǵasy Serikbaı qajy Oraz Aqtóbe qalasynda oblys əkimi Berdibek Saparbaevpen kezdesti.

Kezdesýde óńir basshysy Berdibek Mashbekuly aımaqtaǵy dinı ahýal týraly baıandady.

"Qurmetti Serikbaı qajy Satybaldyuly, Sizdiń Aqtóbege arnaıy saparmen kelýińiz jergilikti jamaǵatqa jiger beredi. Qazir bizdiń oblysta 67 meshit bar, onda 117 ımam jumys isteıdi. Ótken jyly respýblıka deńgeıinde tanymal 30-dan astam teologty arnaıy shaqyryp, jergilikti turǵyndar arasynda túsindirý sharalaryn júrgizdik. Dəstúrli dinge bet buryp jatqan azamattar sany da jyl saıyn artyp keledi. Qaıyrymdylyq baǵytyndaǵy jumystarǵa da kóńil aýdaryp kelemiz. Qazir bizdiń oblysta jetim balalar úıi joq", - dep atap ótti B.Saparbaev.

Sonymen qatar oblys əkimi Bas múftımen ekpe saldyrýdan bas tartqan azamattar men biryńǵaı mektep formasyna qatysty týyndaǵan saýaldardy talqylady.

Óz kezeginde sóz alǵan Serikbaı qajy Satybaldyuly:

"Qadirli Berdibek Mashbekuly,  Sizdiń bastamańyzben Aqtóbe oblysynda dinı salada ıgi is-sharalar atqarylýda. Bul bastamalardy ózge de óńirlerge təjirıbe retinde júzege asyrýǵa bolady. Búginde QMDB-nyń əleýeti kún sanap artyp keledi. Bilim, aǵartý salasyna da kóńil bólip otyrmyz. Qazir "Nur Múbərak" ýnıversıtetinde 2000-ǵa jýyq shəkirtimiz bilim alýda. Bul - sanaýly jyldarda dinı qyzmetkerlerdiń qatary joǵary bilimdi mamandarmen tolyǵady degen sóz. Jýyrda QMDB janyndaǵy "Qajylyq qory" esebinen 100 ımamǵa 50 myń teńge kóleminde jalaqy taǵaıyndaý týraly sheshim qabyldadym. Alla qalasa, ımamdardyń áleýmettik máselesi de kezeń kezeńimen oń sheshimin tabady dep senemin. Taǵy bir jaǵymdy jańalyqtyń biri - Astanada múftııattyń jańa úlken ǵımaratyn ashý josparlanyp otyr", - dedi Bas múftı Serikbaı qajy Oraz.

Kezdesý sońynda Aqtóbe oblysy men Qazaqstan musylmandary dinı basqarmasy arasynda ortaq memorandým qabyldandy.

​