Bas múftı aqparat jáne qoǵamdyq damý vıtse-mınıstrimen kezdesti
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Aqparat jáne qoǵamdyq damý vıtse-mınıstri Marat Ázilhanovpen kezdesti. Bul týraly Aqparat jáne qoǵamdyq damý mınıstrliginiń baspasóz qyzmeti habarlady.
Kezdesýde karantınniń jeńildeýi jaǵdaıynda dinı ǵımarattardyń jumys isteý máseleleri talqylandy. Bas múftı meshitter ashylǵan jaǵdaıda dinı ǵımarattaǵy qyzmet sanıtarlyq normalardy saqtaı otyryp júrgiziletinin málimdedi. Óz kezeginde vıtse-mınıstr QMDB-nyń meshitterde koronavırýstyq indet taralýynyń aldyn alý boıynsha biryńǵaı is-qımyl tártibin ázirleýdiń oryndylyǵyn jetkizdi.
M.Ázilhanov memleket pen dinı birlestikterdiń, ásirese pandemııa sııaqty jahandyq syn-qaterler jaǵdaıynda yntymaqtastyǵy odan ári damytý qajettigin atap ótti. Vıtse-mınıstr QMDB Tóraǵasyna dindar azamattardyń májbúrli karantındik sharalarǵa túsinistikpen qaraǵany jáne olardyń arasynda sanıtarlyq-Epıdemıologııalyq normalardy saqtaýdyń mańyzdylyǵyn túsindirýde memleketke kómekteskeni úshin alǵys aıtty.
Bas múftı vıtse-mınıstrge bıylǵy 31 shilde men 2 tamyz aralyǵynda ótken Qurban aıt merekesi kezinde mınıstrliktiń kórsetken qoldaýyna alǵys bildirdi.
Mınıstrliktiń kómegimen Dinı basqarmanyń «Qurban2020.kz» arnaıy saıty iske qosyldy, sonyń arqasynda azamattar qashyqtan qaıyrymdylyq jasaı alǵanyn nazarǵa salamyz. Jalpy Qazaqstan boıynsha mereke kezinde 80 myńnan astam muqtaj adam qurbandyq etin aldy.
Sondaı-aq taraptar destrýktıvti dinı aǵymdardyń yqpalyna túsken azamattar arasynda túsindirý jumystaryn júrgizý máselelerin talqylady.
