Bas múftı Amangeldi Aıtalymen suhbattasty (FOTO)

Astanada Qazaqstan musylmandary dinı basqarmasynyń ǵımaratynda Bas múftı Serikbaı qajy Oraz belgili qoǵam qaıratkeri Amangeldi Aıtalymen kezdesti.

Kezdesýge QMDB-nyń Aqtóbe oblysyndaǵy ókil ımamy Tólebı Ospan, Aqtóbe qalasynyń bas ımamy Amantaı Sádıev, t.b. din qyzmetkerleri qatysty.

Aqtóbeden arnaıy kelgen mártebeli meıman múftıge qonys qutty bolsyn aıtty.

«Jańa ǵımarattaryńyz qutty bolsyn. Bul – keshendi joba eken. Bári eskerilipti. Sport zaly, kitaphanasy, kompıýter bólmesi, namazhanasyna deıin bar. Men mundaı ǵajaıyp ǵımaratty basqa elden kórgen joqpyn. Din derbes bolmaı, el derbes bolmaıdy ǵoı. Táýbe, derbes múftııatymyz bar. Osynyń bári derbes el bolǵannan keıin oryndalyp jatqan armandar. Jumystaryńyzǵa sáttilik tileımin», – dep aqjarma tilegin jetkizdi Amangeldi Aıtaly.

Óz kezeginde Serikbaı qajy Satybaldyuly:

«Múftııat – musylman qaýymynyń kıeli qarashańyraǵy. Bul – ǵylym men bilimniń, mádenıet pen izgiliktiń, ıgilik pen birliktiń ordasy, halyqqa qajet dinı pátýalar shyǵaratyn, din men dástúrdi nasıhattaıtyn ortalyq. Eldigimizdiń arqasynda osyndaı úlken nyǵmetke bólenip otyrmyz. Alla Taǵala birlik-berekemizden aıyrmasyn», – dep atap ótti.

Basqosý barysynda Bas múftı múftııattyń 2019 jyly atqaratyn aýqymdy jumys josparlarymen bólisti. Sonymen qatar, Aqtóbedegi dinı ahýal týraly suhbattasty.