Bas múftı Almatydaǵy ujymmen birqatar máseleni talqylady (FOTO)

Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly Almaty qalasyna jasaǵan resmı saparyn ujymmen kezdesýden bastady.

Kezdesýge QMDB Apparat basshysy Ǵylymbek Májıev bastaǵan bólim meńgerýshileri men Almaty qalasyndaǵy din qyzmetkerleri qatysty.

Almatylyq áriptesterge nasıhat aıtqan Bas múftı Naýryzbaı qajy Taǵanuly: «Qadirli baýyrlarym! Alla Taǵala «Álı-Imran» súresiniń 110-aıatynda: «Sender eldi jaqsylyqqa shaqyryp, jamandyqtan tyıý úshin shyǵarylǵan qaıyrly úmbetsińder!», – deıdi. Eldi jaqsylyqqa shaqyratyn birden-bir ıslamdyq birlestik – Qazaqstan musylmandary dinı basqarmasy. Dinge qyzmet – Paıǵambar (s.ǵ.s.) joly. Bul – uly mıssııa. Allaǵa shúkir, keshegi babalar ańsaǵan arman búgin oryndaldy. Alla Taǵala derbes el bolýymyzdy násip etti. Alash qaıratkerleriniń «qazaqta múftılik óz aldyna bolý» muraty da araǵa jetpis jyldaı ýaqyt salyp baryp, 1990 jyly iske asty. Mine, bıyl Dinı basqarmaǵa 30 jyl toldy. Endigi maqsat, Paıǵambarymyz (s.ǵ.s.) ósıet etkendeı, osy jumysymyzdy jaqsy kórip, dinge, elge qyzmet etýde tııanaqtylyq tanytý. Ár isimizdi kásibı túrde oryndaýǵa kiriseıik! Ortaq maqsat isinde jumyla jumys isteıik!», – dep atap ótti.

Basqosýda hattamalyq tapsyrmalardy óz merziminde oryndaý, qaıyrymdylyq sharalardy júzege asyrý, ónimdi jumys nátıjesin kórsetý, t.b. máseleler talqylandy.

Kezdesý sońynda QMDB qyzmetkerleri Bas múftımen jańa jobalar men kún tártibinde turǵan birqatar másele tóńireginde pikir alysty.