BAS MÚFTI ALMATYDA JAŃA KITAPTYŃ TANYTYMYNA QATYSTY (FOTO)
Búgin Almaty qalasynda Qazaqstan Ulttyq kitaphanasynda Bas múftı Naýryzbaı qajy Taǵanulynyń jetekshiligimen shyqqan «Babalar izimen: Qazaq dalasyndaǵy musylmandyq mektep» kitabynyń tanytymy ótti. Is-sharaǵa ǵalymdar, jazýshylar, tarıhshylar men zııaly qaýym ókilderi qatysty.
Jańa kitap tanytymynda birinshi sóz alǵan Bas múftı Naýryzbaı qajy Taǵanuly: «Bizdiń kózdegen muratymyz – qazirge deıin saqtalyp kele jatqan ádet-ǵuryp, salt-sananyń negizi musylmanshylyqta jatqandyǵyn dáleldeý. Sebebi sońǵy kezderi qazaqty túrli deńgeıde ıslamnan alystatýǵa tyrysýshy pikirler paıda boldy. Keıbiri teris pıǵylmen ádeıi áreket etse, endi biri bilmestikpen ata-babamyzdan kele jatqan dástúrli dinimizge teris pikir aıtýda.
Halqymyz qaster tutqan, jaýgershilik zamanda batyrlardy Otandy qorǵaýǵa úndegen, jıyn-toılarda jurtty izgilikke shaqyrǵan tól aspabymyz – dombyrany «haram» dep júrgen jastardy osy kitapty oqýǵa shaqyramyn. Sálem salýdy Allaǵa serik qosý dep sanaıtyndarǵa da osy kitapta jaýap jazylǵan. Sálem salý – Allaǵa serik qosý emes, úlken qurmettiń belgisi. San ǵasyrdan beri jalǵasyp kele jatqan tárbıelik máni zor ulttyq qundylyqtarymyzdy joqqa shyǵarý úlken qatelik dep atar edim. Mine, osyndaı jańsaq pikirlerge «Babalar izimen: Qazaq dalasyndaǵy musylmandyq mektep» kitaby tolyqqandy jaýap beredi degen oıdamyz», – dedi.
Is-sharada Prezıdent janyndaǵy Ulttyq ǵylym akademııasynyń vıtse-prezıdenti Asqar Jumadildaev, Jazýshylar odaǵynyń basqarma tóraǵasynyń orynbasary Qasymhan Begmanov, akademık, alashtanýshy Mámbet Qoıgeldi syndy ǵalymdar men zııaly qaýym ókilderi jastardy jat dinı aǵymdardyń yqpalynan saqtaýda jańa kitaptyń rólin aıryqsha atap ótti.
