Bas múftı Almaty Ortalyq meshitinde juma ýaǵyzyn aıtty (FOTO)
Búgin, qasıetti juma kúni Qazaqstan musylmandary dinı basqarmasynyń tóraǵasy Naýryzbaı qajy Taǵanuly Almaty Ortalyq meshitiniń jamaǵatymen júzdesip, Alla úıine jınalǵan qaýymǵa ýaǵyz aıtty.
Jamaǵatqa alǵys aıtýdyń máni men mańyzyn jetkizgen Bas múftı Naýryzbaı qajy Taǵanuly:
«Biz eń áýeli adam balasyn joqtan bar etip jaratqan Jaratýshy Iemizge shúkir aıtamyz. Shynynda, Allanyń adam balasyna bergen nyǵmetiniń shegi joq. Árbir atqan tańdy amandyqpen qarsy alýdyń ózi baǵa jetpes nyǵmet emes pe? Ár kúnimizge shúkir deımiz.
Ekinshiden, bizdi ómirge ákelýge sebepshi bolǵan, sábı sátimizden mápelep, aıalap ósirgen ata-anamyzǵa alǵys aıtamyz. Osyndaıda halqymyzdyń: «Ata – qorǵan, ana – qurban», – degen júrek tebirenterlik qanatty sózi eske túsedi... Qorǵan bolǵan ákemizge, balasy atqa qonsa, taqymyn qysatyn anamyzǵa alǵys aıtý – perzenttik paryzymyz. Taǵdyr jazýymen ómirden ótken bolsa duǵa etip, týystary men zamandastaryna qamqorlyq jasaý – musylmandyq mindetimiz. Alla elshisi osyndaı amalǵa úndegen.
Úshinshiden, aınaladaǵy kisilerge alǵys aıtý – adamgershilik boryshymyz. Musylman balasy qandaı da ıgilik pen nyǵmetke bólense, áýeli Allaǵa shúkir aıtyp, sol jaqsylyqqa sebepshi bolǵan adamǵa alǵysyn bildiredi. Ardaqty paıǵambarymyz Muhammed (oǵan Allanyń salaýaty men sálemi bolsyn) «Adamǵa alǵys aıta almaǵan, Allaǵa shúkir ete almaıdy», – degen.
Aınalamyzǵa alǵys aıtyp, tileýlestigimizdi bildire júreıik, aǵaıyn! Sizderge myń alǵys! Barshańyzǵa Allanyń amandyǵy men bereketin tileımin! Elimiz aman, jurtymyz tynysh, táýelsizdigimiz baıandy bolǵaı!» – dedi.
Qazaqstan musylmandary dinı basqarmasyn ár jyldary basqarǵan Erjan qajy Malǵajyuly men Serikbaı qajy Oraz da juma namazyna qatysyp, eldiń amandyǵyn tilep, duǵa jasady.
