Bas múftı Ábsattar qajynyń batasyn aldy (FOTO)

Almatyǵa arnaıy kelgen Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly R.Súleımenov atyndaǵy Shyǵystaný ınstıtýtynyń dırektory, belgili ǵalym Ábsattar qajy Derbisálimen kezdesti.

Ábsattar Baǵysbaıuly Naýryzbaı qajy Taǵanulyn jańa qyzmetimen quttyqtap, jumysyna sáttilik tiledi. Dinı basqarmada 10 jyldan asa qyzmet atqarǵan burynǵy múftı jańa múftıge bata berip, izgi nıetin jetkizdi.

«Elge qyzmet etýde aıanbańdar. Dinı salaǵa ózińdeı bilikti basshy, dindar azamattyń kómegi qashan da kerek. Sondyqtan ózińe árdaıym tilektespin!», - dedi Ábsattar qajy Derbisáli.

Óz kezeginde Naýryzbaı qajy Taǵanuly: «Bizge baǵyt-baǵdar berip, din jolynda úlgi bolyp, kórsetken kúsh-jiger, aǵalyq aqylyńyz úshin alǵys aıtamyn» dedi. Sondaı-aq Bas múftı usynysymen Dinı basqarma janynan qurylatyn Aqsaqaldar alqasyna múshelikke ótýge Ábsattar qajy qýana kelisimin berdi.

Kezdesý sońynda QMDB Tóraǵasy Naýryzbaı qajy Taǵanuly Ábsattar qajynyń ıyǵyna shapan jaýyp, Dinı basqarmanyń 30 jyldyǵyna oraı jasalǵan káde-syıdy tartý etti.