BAS MÚFTI ABAI OBLYSYNDA «DIN MEN DÁSTÚR» ORTALYǴYNYŃ AShYLÝYNA QATYSTY

Búgin Abaı oblysynyń ortalyǵy Semeı qalasynda QMDB-ǵa qarasty «Din men dástúr» ortalyǵy ashyldy. Aımaqqa arnaıy issaparmen kelgen Bas múftı Naýryzbaı qajy Taǵanuly resmı ashylýyna qatysyp, quttyqtaý sózinde ortalyqtyń mańyzyna toqtaldy.

«Taǵy bir mańyzdy toqtalar nárse ol bıyl múftııat 2024 jyldy «Islam jáne dástúr qundylyǵy» jyly dep jarııalady. San ǵasyrdan beri dinimizben birge jasasyp kele jatqan dástúrimizdi qaıta jańǵyrtý maqsatynda kóptegen is-sharalar qolǵa alyndy. Jyl basynda Babalar izimen: qazaq dalasyndaǵy musylmandyq mektep kitaby syndy iri jobalar elge tanystyryldy. Osy oraıda búgingi «Din men dástúr ortalyǵy» da babalarymyzdan kele jatqan salt-dástúrimizdi jańǵyrtý ordasy bolmaq. Bir jaǵynda shákirtterimiz bilim alsa, ekinshi qabyrǵasynan qazaqtyń salt-dástúriniń ıisi burqyrap qaınap jatatyny anyq. Ortalyq jumysyna sáttilik tileımin» dedi Bas múftı.

Aıta keteıik «Din men dástúr» ortalyǵynyń kólemi 2273 sharshy metrdi quraıdy. Janashyr azamattardyń demeýimen salynǵan ǵımarat 2 bólikten turady. Birinshi jartysy 4 qabattan turatyn «Dinı saýat ashý» ortalyǵy. Ol 100 stýdentke arnalǵan. Barlyq zamanaýı talaptarǵa saı oqý ornynda jatyn bólmeleleri, oqý synyptary, kitaphana, ashana, tazalyq bólmesi, medıtsınalyq bólmege deıin tolyqtaı qamtylǵan. Joǵarǵy 2-3 qabattarynda stýdenterge arnalǵan jatyn bólmeleri, tazalyq bólmesi, medıtsınalyq bólme, qonaqtar bólmesi ornalasqan. 1-qabatta Din men dástúr synyby, Abaı synyby, Shákárim synyby jáne ustazdar bólmesi bar. Tómengi qabatta ashanasy ornalasqan. Munda ulttyq salt-dástúrlerimiz ulyqtalyp, umyt bolyp bara jatqan kóne dástúrler qaıta jańǵyrmaq.