Bas múftı Abaı murasyna arnalǵan respýblıkalyq konferentsııaǵa qatysty (FOTO)
Búgin Semeıde QMDB men Shákárim atyndaǵy ýnıversıtettiń uıytqy bolýymen «Hakim Abaı murasynyń Islam qundylyqtarymen sabaqtastyǵy» atty respýblıkalyq konferentsııa óz máresine jetti.
Aıtýly jıynǵa ýnıversıtet rektory Meıir Ǵarıpollauly, QMDB Tóraǵasy, Bas múftı Naýryzbaı qajy Taǵanuly, akademık, abaıtanýshy Ǵarıfolla Esim, Semeı qalasy Ishki saıasat basqarmasynyń basshysy Nurjan Esenjolov, professor Arap Silámuly men jergilikti ımamdar qatysty.
Alǵash sóz alǵan rektor Abaı murasy, onyń búgingi qoǵamdaǵy mańyzdylyǵy týrasynda aıta kele, sharany uıymdastyrýǵa muryndyq bolǵan QMDB-ǵa óz alǵysyn jetkizdi. «Abaı men Shákárim eline qosh keldińizder. Qoınaýyna qut qonǵan ólkede osyndaı alqaly jıyndy uıymdastyrý úlken baqyt. Qurmetti bas múftı, Jıdebaıǵa jasaǵan zııaratyńyz qabyl bolsyn! Igi shara ońynan ótsin!» dep túıindedi sózin Meıir Eskendirov.
Sondaı-aq konferentsııa barysynda arnaıy baıandama jasaǵan Bas múftı: «Hakim Abaı Allany taný, onyń sıpattaryn bilý úshin ǵylymdy meńger dedi. Bilimdi bolý arqyly ǵana biz kemeldikke jetemiz degen oılaryn kóptegen qara sózderinen ańǵarýǵa bolady. Eger tanym taıaz bolsa, ıman da – álsiz. Ózderińizge málim, Qazaqstan musylmandary dinı basqarmasy 2019 jyldyń qazan aıynda III respýblıkalyq ımamdar forýmyn ótkizdi. Osy forýmda Qazaqstan musylmandarynyń «Jeti qazyq» rýhanı tuǵyrnamasy qabyldandy. Sonyń ishinde bilimdilikti jeti rýhanı qazyqqa arnaıy engizdik», - dedi
Sonymen qatar, ıgi sharada abaıtanýshy ǵalymdar Abaı men Shákárim, ál-Farabı murasy jóninde baıandama jasady. Al konferentsııa sońynda jıynnyń úndeýi qabyldandy.
