Bas múftı «24 habar» telearnasyna tikeleı Efırde suhbat berdi (FOTO)

Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly «24 Habar» telearnasyna tikeleı Efırde suhbat berdi.

«Adamdy rýhanı kúızelisten qutqarýdyń joldary» atty taqyrypta suhbat bergen Bas múftı tótenshe jaǵdaıǵa baılanysty QMDB Ǵulamalar keńesiniń shyǵarǵan pátýasyn tanystyryp, karantın kezinde oraza ustaý, ýaqytty tıimdi paıdalaný, qulshylyqty arttyrý, duǵa jasaýdyń mańyzy syndy birqatar saýaldar tóńireginde oı-keńesterimen bólisti.

«Alla Taǵala qasıetti Qurandy ár qıyndyqpen birge jeńildik bar ekenin baıandaǵan. Biz ótpelige ókinish bildirmeı, ótkenge salaýat, keler kúnnen úlken úmit kútken halyqpyz. Ardaqty Paıǵambarymyz (oǵan Allanyń salaýaty men sálemi bolsyn) ósıet etkendeı, adam balasy qandaı jetistikke jetip, nyǵmetke bólense, osynaý jaqsylyqtarǵa ıgi nıetiniń nátıjesinde qol jetkizedi.

Dana halqymyzda «Jaqsy sóz – jarym yrys» degen sóz bar. Bul – jaqsylyqqa umtylǵan jannyń úmitine qanat bitirip, janǵa qýat, kóńilge medeý bolatyn sóz. Úmitsizdikke boı aldyrmaı, jaqsy nıetpen bolashaqqa qadam basý – adamdyq qasıettiń biri. Endeshe, syndarly sátte bir-birimizge qoldaý kórsetip, duǵa jasaıyq. Alla elimizdi, jerimizdi túrli dertten saqtap, óz panasynda saqtaǵaı», - dep atap ótti Naýryzbaı qajy Taǵanuly.