Bas meshittiń eriktiler toby Talapker turǵynyna qol ushyn sozdy (FOTO)

Qınalǵanǵa qol ushyn sozyp, qaıyrymdylyq jasaý - qashanda qoǵam ıgiligin arttyratyn abzal amaldardyń biri. Osy sebepti de Qazaqstan musylmandary dinı basqarmasy jumysynyń basty baǵyttarynyń biri bolyp bekitilgen qaıyrymdylyq sharalaryna jyl saıyn basa mán berilip, jumys aýqymy da artyp keledi. Búgingi tańda túrli qaıyrymdylyq sharalary turaqty túrde respýblıkalyq kólemde uıymdastyrylyp, jyl sanap jańa jobalar da paıda bolýda. QMDB-ǵa qarasty qulshylyq ordalarynyń qaıyrymdylyq qushaǵy meshitke kelýshilermen ǵana shektelmeı, áleýmettik jeli arqyly da járdem suraǵandarǵa jylý syılap, jylaǵanda janynan tabylyp keledi.

Osy oraıda Memleket basshysy Qasym-Jomart Kemelulynyń «2020 - Eriktiler jyly» dep jarııalaýyna oraı Bas múftı Naýryzbaı qajy Taǵanuly barsha dinı qyzmetkerlerge úndeý jarııalap, babalarymyz armandap ótken «Izgi qalanyń turǵyndaryn» qalyptastyrýǵa úles qosýǵa bastaǵan bolatyn. Osy oraıda el meshitteriniń jamaǵaty men shákirtteri arasynda kóptegen eriktiler toby qurylyp, qoǵam arasynda qaıyrymdylyq shoǵyn mazdatqan sharalar jańa qarqyn ala túskendeı.

Elorda meshitteri arasynda da eriktiler tobynyń qatysýymen ótkizilip kele jatqan arnaıy senbilikter men qar kúreý jumystary, ásirese, bıylǵy qystyń qaharyna qatty ushyraǵan qala turǵyndary úshin edeýir kómek bolyp keledi. Qystyń borandy kúnderi «tegin taksı» qyzmetin uıymdastyryp, júrginshilerdi jolda qaldyrmaǵan tyrysqan erikti jandar endi qar kúreý jumystaryn jumyla júrgizý ústinde. Kúnderdiń sultany búgingi juma kúni de «Áziret Sultan» meshitiniń uıymdastyrýmen eriktiler toby taǵy bir saýapty is tyndyrdy.

Áleýmettik jelide úıi qardyń astynda qalǵanyn aıtyp, sý erise baspanasyn basyp qalatyn aıtyp járdem suraǵan Talapker aýylynyń turǵynynyń jazbasy júrekterdi beı-jaı qaldyrmaı, juma namazynan soń «Áziret Sultan» meshitiniń qyzmetkerleri men eriktiler toby atalǵan mekenjaıǵa bet aldy. Keı tusy kisi boıyndaı bıiktikte siresip qatqan qardy kúreýge qajetti tehnıka jalǵa alynyp, jazba avtory Nurgúl hanymnyń «qar erise» degen qorqynyshy kúrelip tastaldy. Igi istiń basynan tabylǵan «Áziret Sultan» meshitiniń bas ımamy Erbolat Júsipov Nurgúl Aflaevamen júzdesip, jyly lebizin bildirdi.

«Men 4 balanyń anasymyn. Joldasym dánekerleý jumystarymen aınalysady. Kórshilerimizben birigip tehnıka jaldap kórdik. Biraq,  qaıta-qaıta tehnıka shaqyrtýǵa qarjy tapshylyǵy qolbaılaý. Amalsyz belgili «TAUNEWS» aqparattyq agenttigine habarlastyq.

Shyny kerek, kóz jasym jerde qalmaı, otbasymyzǵa tóngen jaǵdaı týraly jýrnalısterge bergen úndeýim Mýftııattiń dinı kyzmetkerlerine jetip, kómek osynsha tez keledi dep oılamaǵan edik. Meshit qyzmetkerleri qarǵa kómilip qalǵan úıimizdiń aýlasyn tazalap, balalarymyzǵa tátti de ákeldi.

Tutas bir aýyldyń, joq-jitigin túgendep, jyrtyǵyn bútindegen eriktilerdiń eńbegi – erlik! «Jaqsylyq jasaý júrekten» degen osy bolsa kerek» – dep alǵysyn bildirdi Nurgúl Aflaeva.

Sýretterdi «FOTOGALEREIa» aıdarynan kóre alasyzdar!