Bas meshittiń bala shákirtterine sertıfıkat tabystaldy (FOTO)
Búgin Astana qalasyndaǵy respýblıkalyq «Áziret Sultan» meshitiniń jazǵy saýat ashý kýrsynyń shákirtteri oqý baǵdarlamasyn aıaqtap, arnaıy sertıfıkat tabystaý rásimi bolyp ótti. QMDB tóraǵasynyń birinshi orynbasary, «Áziret Sultan» meshitiniń bas ımamy Naýryzbaı qajy Taǵanulynyń bastamasymen bıylǵy jyly bul kontserttik sharaǵa astasyp, búldirshinderge mereke uıymdastyryldy.
Meshit meıramhanasynda ótkizilgen shara aıasynda búldirshinderge dastarhan jaıylyp, jemis-jıdek pen tátti taǵamdar berildi. Al, ata-analar úshin arnaıy kórermen zaly jasalyp, perzentteriniń qyzyǵyn tamashalaýǵa jaıly jaǵdaı usynyldy. «Áziret Sultan» meshitiniń jazǵy saýat ashý kýrsynda bilim jetildirgen bala shákirttiń Quran aıatyn tıláýat etýimen ashylǵan shara aıasynda ózge de shákirtter óz ónerlerin kórsetip, ata-analar qaýymyna kúmbirletip kúı shertip, sańqyldatyp jyr oqyp berdi. Budan bólek, ár top shákirtteri ózderi daıyndaǵan ónerlerin pash etip, «Imanı jaz» lagerinde úırengenderin kópshilikpen bólisti.
Aıta keteıik, bıylǵy jyly respýblıkalyq «Áziret Sultan» meshitiniń jazǵy saýat ashý kýrsyn 350-den astam bala shákirtter támamdap otyr. Shákirtterdiń barlyǵyna meshit sertıfıkaty tabystalyp, bas ımam Naýryzbaı qajy Taǵanuly atynan arnaıy syılyqtar úlestirildi. Sondaı-aq, ár top arasynan úzdik oqýshy tańdalyp, qosymsha syılyqpen marapattalyp otyr.
Bıylǵy jyly bala shákirtter arasynda tuńǵysh ret «Meniń súıikti meshitim» atty sýret saıysy uıymdastyrylǵan bolatyn. Bala sýretshilerdiń qııaly men qalamynan týyndaǵan sýretter qorytyndysy da búgingi keshte jarııa etilip, jeńimpaz shákirtterge baǵaly syılyqtar tabystaldy. Sondaı-aq, sýret saıysyna qatysqan 17 shákirt te yntalandyrý syılyǵyna ıe bolyp, kóńilderi kóterińki qaıtty.
