Bas meshittiń bala shákirtteri oqýlaryn aıaqtady (FOTO+VIDEO)

Búgin Nur-Sultan qalasyndaǵy respýblıkalyq «Áziret Sultan» meshitiniń «Imanı jaz –2019» jazǵy saýat ashý kýrsy óz jumysyn aıaqtap, bala shákirtterge arnaıy sertıfıkat tabystaý rásimi bolyp ótti. Ataýly kúnge oraı bala shákirtterge saltanatty shara uıymdastyrylyp, ata-analar qaýymynyń qatysýymen meshittegi jazǵy saýat ashý kýrsynyń sońǵy kúni merekege jalǵasty.

Saltanatty shara shymyldyǵy osy saýat ashý kýrsynda bilim alǵan bala shákirttiń qasıetti Quran aıattarymen oqylýymen ashylyp, batamen bastaldy. Respýblıkalyq «Áziret Sultan» meshitiniń birinshi naıb ımamy Marat Bektazınov búldirshinderge quttyqtaý lebiz aıtyp, jazǵy demalystaryn jaqsylyqqa jumsaǵan shákirtterge rızashylyǵyn jetkizdi. Osy ýaqyt ishinde úırengen bilimderi men ádep-tárbıe negizderin umytyp qaldyrmaı, ómirlerine serik etýge shaqyrdy.

Saltanatty shara aıasynda bala shákirtter ustazdary men ata-analary aldynda óz ónerlerin pash etip, qýanyshty sharaǵa óz úlesterin qosty. Qazaqy qara dombyra kúmbirlep, mereke sánin odan ári arttyra tústi. Búldirshin qyzdar baldaı tátti tilderimen bes paryz jaıly án aıtyp, kópshiliktiń qoshametine bólendi. Búldirshindermen qoshtasý rásimine oraı arnaıy dastarhan jaıylyp, tátti taǵamdar tartý etildi.

Aıta keteıik, respýblıkalyq «Áziret Sultan» meshitiniń «Imanı jaz – 2019» jazǵy saýat ashý kýrsyna bıylǵy jyly 220 er bala jáne 175 qyz bala qabyldanǵan bolatyn. Shákirtterdiń barlyǵyna «Áziret Sultan» meshitiniń arnaıy sertıfıkaty tabystaldy. Sondaı-aq, shákirtterge 20 kún boıy ustazdyq etip, bilim úıretken tájirıbelik synaqtan ótýshi ustazdar qaýymyna «Alǵys hat» tabystalyp, eńbekteri baǵalandy.

Sýretterdi «FOTOGALEREIa» aıdarynan kóre alasyzdar!