Bas meshittegi «Imanı jaz» jazǵy saýat ashý kýrsy aıaqtaldy (FOTO)

Respýblıkalyq «Áziret Sultan» meshitinde maýsym aıynyń basynda bastalǵan «Imanı jaz – 2022» jazǵy saýat ashý kýrsy búgin óz máresine jetip, bala shákirttermen qoshtasý keshi bolyp ótti. Shara bastalmas buryn meshit aýlasynda bala shákirtter úshin «Shashý» otbasylyq ansambli óner kórsetip, kúımen sýsyndatty.

Budan soń jazǵy saýat ashý kýrsynyń shákirtteri arnaıy jaıylǵan merekelik dastarhanǵa jaıǵasyp, kontserttik baǵdarlama tamashalady. Aıta keteıik, kontserttik baǵdarlama túgelimen shákirtterdiń qatysýymen qurylyp, 20 kúndik jazǵy saýat ashý kýrsynda bilgen bilimderi men úırengen dúnıelerin kórermen bolyp kelip otyrǵan ata-analaryna pash etti. Saltanatty sharanyń ózi búldirshin shákirttiń Quran oqýymen ashylyp, ary qaraı ártúrli jastaǵy shákirtterdiń ónerlerine jalǵasty. Biri Ybyraı babamyzdyń óleńine mánerlep oqyp, zamandastaryn bilim alýǵa shaqyrsa, endi bir top hormen ata-anaǵa duǵa jasap, kórermenderdiń kózine jas úıirdi. Sondaı-aq, shákirtter Alla Taǵalanyń 99 kórkem esimin de jatqa aıtyp, jınalǵandardy taǵy bir tańǵaldyrdy. Shara sońynda eresek shákirtter Jazǵy saýat ashý kýrsy jaıly óz oılaryn bildirip, ustazdar qaýymyna óz alǵystaryn bildirdi.

Aıta keteıik, bıylǵy jyly «Áziret Sultan» meshiti uıymdastyrǵan jazǵy saýat ashý kýrsyna 500-den astam shákirt qabyldanǵan bolatyn. Bala shákirtter 20 kún ishinde «Quran álippesi» jáne «Imandylyq álippesimen» tanysyp, «Tárbıe dáristerin» támamdap shyqty. Shákirtterdiń barlyǵy oqý baǵdarlamasyn aıaqtaǵany úshin arnaıy «Anyqtamamen» marapattaldy.

Sýretterdi «FOTOGALEREIa» aıdarynan kóre alasyzdar!