Bas meshitte Ramazan aıyna oraı onlaın jobalar bastaldy (FOTO)

Búgin ısi musylman qaýymy úshin qasıeti erekshe Ramazan aıy da bastaldy. Alla razylyǵyna bólenýdi murat etken musylman qaýymy endi bir aı boıy oraza ustap, Allanyń meıirimi men rahymy jaýǵan múbárak mezgildi saýapqa toly ótkizýge tyryspaq. Osy tusta jamaǵatqa jón siltep, rýhanı tálim-tárbıemen sýsyndatatyn dinı ýaǵyz-nasıhat jumystarynyń orny erekshe desek te bolady.

Osyǵan oraı, qasıetti Ramazan aıynyń bastalýyna baılanysty respýblıkalyq «Áziret Sultan» meshiti birneshe onlaın jobalardy iske qosyp otyr. Karantın rejıminiń talaptaryna sáıkes, meshittegi barlyq ýaǵyz-nasıhat jumystary  onlaın júıege aýysyp, pandemııa bastalǵaly meshit qyzmetkerleriniń dáristeri men sabaqtary, ýaǵyzdary áleýmettik jeli paraqshalary men ókildik saıttarynda jarııalanyp kelgen bolatyn.

Qasıetti Ramazan aıyna oraı atalmysh baǵdarlama qatary «30 kúnge – 30 suhbat», «Namaz oqyp úıreneıik», «Onlaın Quran hatym» jobalarymen tolyǵyp otyr. Ramazan aıynyń ár kúni saǵat 14.30-da Elorda ımamdary «30 kúnge – 30 suhbat» baǵdarlamasy aıasynda orazaǵa qatysty túrli taqyrypta sóz qozǵaıyn bolady. Sondaı-aq, kún saıyn 16.00-de «Áziret Sultan» meshitiniń naıb ımamy Tamırlan Ibraev «Namaz oqyp úıreneıik» sabaǵyn júrgizbek. Ramazan – qasıetti Quran túsken aı. Osyǵan oraı, elimizge belgili qarı, «Áziret Sultan» meshitiniń naıb ımamy Jumanazar Sadyrhanov kún saıyn 18.30-da tikeleı Efırde Quran hatym jasaıtyn bolady.

aıta keteıik, atalmysh baǵdarlamalardyń barlyǵy da «Áziret Sultan» meshitiniń ınstagram paraqshasynda tikeleı Efırden kórsetiledi. Sondaı-aq, beınejazbasy saıtymyzǵa júktelip otyrady.

Qurmetti oqyrmandar! Barshamyzǵa qasıetti Ramazan aıyn Alla razy bolǵan kúıde ótkizýdi násip etsin!