Bas meshitte Qurban aıt merekesi bastaldy (FOTO+VIDEO)

Búgin elimiz boıynsha jer-jerde Qurban aıt namazy oqylyp, ısi musylman qaýymynyń qasıetti merekesi bastaý aldy. Endi úsh kún boıy kúlli jer betin meıirimge orap, qaıyrymdylyqpen qaýyshtyratyn qasıetti mereke qazaq dalasynda ózine jarasymdy sán-saltanatymen ımandylyq dýmanyna jalǵasatyn bolmaq.

Eleń-alańmen erte turyp, qulshylyq ordalaryna qaraı aǵylǵan elordalyq jamaǵat tańǵy 7-de ıin tirese sap túzep, aıt namazyn oqýmen bastady. Ardaqty Paıǵambarymyz (s.ǵ.s.) óziniń bir ósıetinde: «Bizdiń bul kúnde alǵashqy atqaratyn isimiz – namaz oqý...», – dep atap kórsetkendeı, qasıetti mereke qulshylyqpen bastalyp, Bir Allaǵa syıynǵan myńdaǵan jamaǵattyń tákbiri men duǵasyna jalǵasty.

Kólemi jóninen Ortalyq Azııa boıynsha teńdesi joq respýblıkalyq «Áziret Sultan» meshitiniń ózi bul kúni jamaǵat úshin buıym bolmady. Meshit syrtyna arnaıy jaıylǵan kilem ústinde kún shyqpastan jaıǵasqan jamaǵattyń qaz-qatar búgilgen tizeler men jaıylǵan alaqandary – júrekter birligi men halyq yntymaǵynyń ystyq kórinisi boldy. Aıt namazynan soń meshit aýlasynda bastalǵan ulttyq oıyndar saıysy men «Qaıyrymdylyq jármeńkesi» de meshittegi merekeniń mánin arttyryp, sánin kirgize tústi. Qaýyshqan qushaqtar men bir-birin quttyqtap, qaýqyldasqan qýanyshty jandarǵa tolǵan qulshylyq ordasyndaǵy qasıetti mereke respýblıkalyq «Áziret Sultan» meshitinde osylaı bastaldy.

Aıt namazy aldynda meshit minberine QMDB tóraǵasy, Bas múftı Serikbaı qajy Oraz shyǵyp, jamaǵatty Qurban aıt merekesimen quttyqtap, izgi lebizin jetkizdi. Qasıetti merekeniń tarıhyn baıandap, taǵylymyn túsindirgen Bas múftı ýaǵyzy jamaǵat úshin janǵa azyq boldy. Rabbysyna boıusynǵan kúıde sap túzep, qatar quraǵan jamaǵatqa Bas múftı aıt qutpasyn aıtyp, ulyq namazdy ótkizdi. Aıt merekesindegi alǵashqy amaldy ótep bolǵan myńdaǵan jamaǵattyń tákbirine ulasyp, duǵasymen nárlendi.

Sýretterdi «FOTOGALEREIa» aıdarynan kóre alasyzdar!