Bas meshitte Qadir túni Quran hatym duǵasy jasaldy (FOTO+VIDEO)

Búgin – adamzat balasyna aq pen qarany aıyrýshy retinde túsirilgen Quran kárimde «myń aıdan da qaıyrly» dep madaqtalǵan qasıetti Qadir túni. Saýaby seksen úsh jylǵa teń keletin ulyq túndi ısi musylman qaýymy qulshylyqpen ásemdep, keshirim men meıirimge toly mezetten úles alýǵa asyǵady. Óıtkeni, Bul túni taǵdyrlar jazylyp, shynaıy keshirim tilegen musylmannyń kúnási keshirilip, sansyz saýaptar jazylatyn bolmaq.

Osyndaı ıgi tilek júregin kernegen musylman qaýymy búgin qulshylyq ordalaryn lyq toltyrdy. Nur-Sultan qalasyndaǵy respýblıkalyq «Áziret Sultan» meshitiniń ózinde bul túni ıne shanshar oryn qalmady desek te bolǵandaı. Alyp meshittiń ishi ǵana emes, atshaptyrym aýlasy da sap túzegen jamaǵatqa tolyp, jalpy sany 50 000-nan astam jan qasıetti Qadir túnin qarsy aldy. Bul túni Bas meshitte jamaǵatqa barynsha jaılylyq jasalyp, meshit aýlasyna jaınamazdar tóselip, qosymsha oryndar ázirlengen. Meshitte oqylyp jatqan namaz ben tań raýandaǵanǵa deıin jalǵasatyn taǵylymdy ýaǵyzdar arnaıy LED Ekrandar arqyly syrttaǵy jamaǵatqa kórsetilip turatyn bolmaq.

Qasıetti túndi qarsy alýǵa jıylǵan jamaǵatty QMDB tóraǵasy, Bas múftı Serikbaı qajy Oraz haziret quttyqtap, búgingi túnniń berekeli bolýyn tiledi. «Myń aıdan da qaıyrly» Qadir túni jaıynda jamaǵatqa qysqasha ýaǵyz aıtyp, saýapqa toly sátti abzal amal-árekettermen árleýge úndedi.

Myńdaǵan musylman jamaǵaty bir úıdiń balasyndaı birlikpen sap túzep, taraýıh namazyn oqyp bolǵasyn Bas meshitte Quran hatym duǵasy jasaldy. Elimizge belgili Quran bilgirleri bul túni qasıetti Qurandy hatym etip, Bas múftı Serikbaı qajy Oraz hatym duǵasyn jasady.

Sýretterdi «FOTOGALEREIa» aıdarynan kóre alasyzdar!