Bas meshitte naıb múftı tóraǵalyǵymen Halyqaralyq konferentsııa ótti (FOTO)
Búgin Astana qalasyndaǵy respýblıkalyq «Áziret Sultan» meshitinde «Islam mádenıetiniń órkendeýine Qazaqstannyń qosqan úlesi» atty halyqaralyq ǵylymı konferentsııa bolyp ótti. Qazaqstan musylmandary dinı basqarmasynyń QR Din isteri jáne azamattyq qoǵam mınıstrligi Din máseleleri jónindegi ǵylymı-zertteý jáne taldaý ortalyǵy jáne Islam Yntymaqtastyǵy Uıymy janyndaǵy Islam tarıhy, óneri men mádenıetin zertteý ortalyqtarymen (IRCICA) birlese uıymdastyrǵan konferentsııa jumysyna elimizdiń ıslamtanýshy ǵalymdary men bilikti mamandary, din qyzmetkerleri men kallıgraf-sáýletshiler qatysyp, ortaq taqyryp aıasynda oı qorytty.
QMDB tóraǵasynyń birinshi orynbasary, naıb múftı, respýblıkalyq «Áziret Sultan» meshitiniń bas ımamy Naýryzbaı qajy Taǵanulynyń tóraǵalyǵymen ótken konferentsııa aıasynda qazaq dalasyndaǵy Islam dininiń tarıhyn túgendep, babalar murasyn búgingi kúnmen baılanystyryp, tarıhı qundylyqtarymyzdy dáripteýge baǵyttalǵan baıandamalar jasaldy. QMDB-nyń qyzmetkerleri men óńirlerdegi ókil ımamdary, atalmysh ortalyqtardyń bilikti mamandary bas qosqan halyqaralyq konferentsııa jumysyna QR Din isteri jáne azamattyq qoǵam vıtse-mınıstri Berik Aryn men Islam tarıhy, óneri men mádenıetin zertteý ortalyǵynyń bas hatshysy Halıt Eren myrzalar da qatysyp, ózderiniń quttyqtaý lebizderin bildirdi.
Qazaqstan memleketiniń Islam dininiń gúldenýine qosqan úlesi jaıynda QR Joǵarǵy Sotynyń azamattyq ister jónindegi sot alqasynyń bas konsýltanty Boranbaeva Gúlnar, IRCICA uıymynyń Ortalyq azııa boıynsha sarapshysy Áshirbek Múmınov, QMDB tóraǵasynyń orynbasary, Alaý Ádilbaev, Din máseleleri jónindegi ǵylymı-zertteý jáne taldaý ortalyǵynyń dırektory Aınur Ábdirásilqyzy, Halyqaralyq qazaq-túrik ýnıversıtetiniń professorlary Dosaı Kenjetaı men Qoja muhtar Baqadyruly, Iassaýıtaný ortalyǵynyń aǵa ǵylymı qyzmetkeri Jandarbek Zikirııa, QazUÝ TÚRKSOI kafedrasynyń meńgerýshisi Qydyr Tóráli, syndy ǵalymdarymyzdyń jasaǵan baıandamalary basqosý mańyzyn arttyryp, qazaq dalasynan shyqqan oıshyldarymyz men irgeli oqý oryndary jaıly, Orta Azııadaǵy din ilim júıesi jóninde tyń maǵlumattarmen baıyta tústi.
Sondaı-aq, elimizdiń ár óńirinen kelgen ókil ımamdar Smaıyl Seıtbekov (Mańǵystaý), Batyrjan Mansurov (Atyraý), Ardaq Orazbaevtardyń (Almaty oblysy) Islam mádenıetiniń qazaq dalasynyń ár túkpirinde qalaı damyǵandyǵynan syr shertetin baıandamalary kóptiń kóńilinen shyǵyp, tarıhymyz tyń derektermen tolyqtyryla tústi.
Sondaı-aq, konferentsııa aıasynda elimizdiń kallıgraf sheberleriniń qolynan shyqqan týyndylar kórmesi de ótkizildi. Konferentsııaǵa qatysýshy kallıgraf Asylbek Baızaquly, sýretshi keramık Rysbaev Abaıhan, ónertaný ǵylymdaynyń kandıdaty Merýert Qurmanǵalıevter Qazaqstandaǵy Islam sáýlet óneri men eskertkish jádigerleri jaıynda qundy pikirler aıtyp, baıandama jasady.
