Bas meshitte «Batamenen el kógerer» jobasy bastaldy (FOTO)

Búgin, qasıetti Ramazan qarsańynda Nur-Sultan qalasyndaǵy respýblıkalyq «Áziret Sultan» meshitinde «Batamenen el kógerer» jobasy bastaý aldy. Musylman qaýymy úshin qadiri erekshe múbárak aı boıy ıgi joba jalǵasyn taýyp, ár kúni 15 mınýt saıyn duǵa jasalyp, bata berilip otyratyn bolmaq. Aıta keteıik, joba jospary boıynsha ár kúni kezekshi ımam caǵat 08.00 ben 20.00 aralyǵynda ár 15 mınýt saıyn «Áziret Sultan» meshitiniń ınstagram jelisindegi paraqshada tikeleı kórsetilimge shyǵyp turady.

Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly QR Prezıdenti janyndaǵy Ortalyq kommýnıkatsııalar qyzmetiniń alańynda «Karantın jaǵdaıyndaǵy Ramazan» taqyrybynda ótken baspasóz konferentsııasynda «Batamenen el kógerer» jobasy jaıly aıryqsha atap ótken bolatyn. Musylman qarýy – duǵa desek, qasıetti Ramazan aıynda jasalǵan árbir izgi amaldyń Alladan qaıtarymy bolary sózsiz. Sol úshin de osyndaı qysyltaıań shaqta ǵıbadatqa kóńil buryp, Alladan surap duǵa jasaýdyń mańyzy aıryqsha.

Bas múftı bastamasymen júzege asqan ıgi jobanyń alǵashqy kezegin Nur-Sultan qalasynyń jáne «Áziret Sultan» meshitiniń bas ımamy Erbolat Júsipov ózi ótkizdi. Qasıetti Ramazan aıy barsha musylman qaýymy úshin saýapqa tolýyn surap, elimizge amandyq, jerimizge tynyshtyq tiledi.