Bas meshitte «Aýyzashar qorjyndaryn» taratý sharasy bastaldy (FOTO)

Búgin, qasıetti Ramazan aıynyń alǵashqy kúni elorda meshitteri 1500 otbasyǵa aýyzashar qorjyndaryn jetkizip bermek. Bul jaıynda respýblıkalyq «Áziret Sultan» meshitinde bastalǵan «Ramazan shýaǵy: Aýyzashar qorjyndaryn taratý» sharasy barysynda Nur-Sultan qalasynyń bas ımamy Erbolat Júsipov málim etti.

Demeýshi azamattardyń, janashyr jamaǵattyń atsalysýymen qaladaǵy 12 meshit ramazan aıy boıy kún saıyn osy kólemdegi aýyzashar qorjyndaryn muqtaj jandardyń mekenjaılaryna jetkizip otyratyn bolmaq. Ekinti namazynan soń «Áziret Sultan» meshitinde arnaıy basqosý ótip, meshit bas ımamy Erbolat Júsipov eriktiler tobyna aq batasyn arnap, saýapty saparǵa shyǵaryp saldy.

Arnaıy appaq qorapshamen qaptalǵan aýyzashar qorjyndarynda eki túrli ystyq tamaq, sýsyn, salat jáne túrli jemister salynǵan. Atalmysh sharaǵa atsalysyp, Alla razylyǵyn izdep, musylman baýyryńyzǵa aýyzashar bergińiz kelse, myna nómirge habarlasýǵa bolady: 8 707 622 69 22.

Sýretterdi «FOTOGALEREIa» aıdarynan kóre alasyzdar!