Bas meshit shákirtteri arasyndaǵy Bilim saıysy máresine jetti (FOTO)

Qasıetti juma kúni Astana qalasyndaǵy respýblıkalyq «Áziret Sultan» meshitiniń shákirtteri arasyndaǵy Bilim saıysynyń aqyrǵy aınalymy bolyp ótti. Esterińizde bolsa, osydan birer apta  buryn Bas meshit shákirtteri arasyndaǵy dástúrli Bilim saıysy bastalyp, irikteý kezeńi ótkizilgen bolatyn. Bıylǵy jyly «Islam aqıdasy» kitaby boıynsha uıymdastyrylǵan Bilim saıysyna qatysqan 120 shákirttiń arasynda joǵary upaı jınaǵan bes úmitker juma namazynan soń jamaǵat aldynda baqtaryn sanap, bilim jarystyrdy.

QMDB tóraǵasynyń birinshi orynbasary, naıb múftı, «Áziret Sultan» meshitiniń bas ımamy Naýryzbaı qajy Taǵanuly aqtyq aınalym aldynda talapty jastarǵa sáttilik tilep, ilim jolyndaǵy izdenisteriniń jemisti bolýyn tiledi. Bas meshit shákirtteri arasynda jyl saıyn turaqty túrde ótkizilip kele jatqan Bilim saıysynyń túrli sala boıynsha uıymdastyrylyp, shákirtter bilimin jan-jaqty damytýǵa basymdyq berilýde ekenin atap ótti.

Test túrinde ótken irikteý kezeńinen úzdik shyqqan bes úmitker bul kúni óz baqtaryn bılet sýyryp, bilgenin dúıim jamaǵattyń aldynda irkilmeı aıtýmen synady. Shákirtter bilimin saraptap, ádil tóreligin shyǵarýǵa QMDB Halyqaralyq qatynastar jáne hattama bóliminiń meńgerýshisi Ershat Ońǵarov, Astana qalasy Din problemalaryn zertteý ortalyǵynyń basshysy Japal Dolıevtar shaqyrylyp, qazylyq jasady. Bılette berilgen suraqtardan bólek qosymsha saýaldar qoıylyp, shákirtter bilimi jiti tekserildi.

Saıys qorytyndysy boıynsha Bilim baıqaýynyń júldeli I-orny (35 000t) Sadıbekov Medetke buıyrdy. Al, júlde qory 25 000 bolatyn II-oryndy Madıbaev Murat ıelendi. Qos qarsylasyna ese jibergen Toqmaǵanbetov Erkebulanǵa III-oryn berilip, 15 000 teńgelik sertıfıkat berldi. Qalǵan eki qatysýshy Nuraddın Aqjol men Aqjan Baǵdáýletke «Yntalandyrý» syılyǵy (10 000) syılyǵy berildi.

Sýretterdi «FOTOGALEREIa» aıdarynan kóre alasyzdar!