Bas meshit shákirtteri Abaı murasy jóninde bilim jarystyrdy (FOTO+VIDEO)
Búgin Nur-Sultan qalasyndaǵy respýblıkalyq «Áziret Sultan» meshitinde hakim Abaıdyń 175 jyldyǵyna oraı Nur-Sultan ókildigi «Rýhanı jastar» qanatynyń uıymdastyrýymen ult ustazynyń murasyn ulyqtaǵan aıtýly baıqaý bolyp ótti. «Talpynǵan shyǵar aıǵa alys» atty taqyryp aıasynda ótken baıqaýǵa Bas meshit shákirtteri arasynan iriktelip shyqqan alty úmitker qatysyp, jamaǵat aldynda óz ónerlerin kórsetti.
Atap aıtqanda, shákirtter baıqaýdyń I-kezeńinde Abaı Qunanbaıulynyń jyrlaryn jatqa oqýdan saıysqa tússe, II-kezeń tapsyrmasy boıynsha danyshpan babamyzdyń qara sózderinen aıtylǵan úzindini jalǵap áketip, sol qara sózdiń arqalaǵan júgin, aıtar oıyn ashyqtady. Al, «Salt-dástúr sóıleıdi» atty III-kezeńde úmitkerlerge ártúrli upaı sandary kórsetilgen uıashyqtar usynylyp, ulttyq qundylyqtarymyz jaıly biletinderi sarapqa salyndy.
Abaı murasynyń san qyryn qamtyǵan aıtýly saıysqa belgili aıtysker aqyn, fılologııa ǵylymdarynyń kandıdaty Serikzat Dúısenǵazın, «Áziret Sultan» meshitiniń Bas ımamy Erbolat Júsipov pen Muslim.kz saıtynyń redaktory Aıdos Imantaılar qazylyq etip, aqtyq saıysqa sýyrylyp shyqqan alty úmitkerdiń bilimin jan-jaqty tarazylaı tústi. Ár úmitkerge qazylar tarapynan úsh suraqtan qoıylyp, Abaı óleńderi men qara sózderin jamaǵat aldynda jatqa oqýy men mánerine de mán berildi.
Saıys qorytyndysy boıynsha «Talpynǵan shyǵar aıǵa alys» baıqaýynyń bas júldesi Qazybek Anarǵa buıyryp, 50 000 teńgeni enshiledi. Upaı sany boıynsha sál tómendeý túsken Qońyrbaeva Arýjan (II-oryn) men Serik Esenbol (III-oryn) jeńistiń kelesi satysynan tabyldy. Sondaı-aq, baıqaýǵa qatysqan qalǵan úmitkerlerge de arnaıy sertıfıkat tabystalyp, qoshamet kórsetildi.
Qasıetti Quran aıattarymen ashylǵan Abaı oqýlarynyń meshit shákirtteri arasynda arnaıy uıymdastyrylǵanyna jamaǵat ta rızashylyqtaryn bildirip, ult ustazynyń qundy murasyn nasıhattaý jumysyna tilekterin bildirip, batalaryn arnady. Tipti, saıys arasynda jamaǵat arasynan Abaı óleńderin jatqa oqıtyndar da tabylyp, jarys kórigin qyzdyra tústi.
Sýretterdi «FOTOGALEREIa» aıdarynan kóre alasyzdar!
