Bas meshit qonaqtary úshin aıryqsha joba bastaldy (FOTO)
Búginde ataq-abyroıy alys-jaqyn shetelderge keńinen jaıylǵan respýblıkalyq «Áziret Sultan» meshitinde búgin jamaǵat úshin aıryqsha joba bastaldy. Tek juma kúni saǵat 10.00 men 12.00 aralyǵynda «Áziret Sultan» meshitiniń resmı portaly Muslim.kz saıtynyń qyzmetkerleri qulshylyq ordasynyń qonaqtary úshin tegin fotosessııa ótkizip turatyn bolmaq.
Elordamyzǵa at basyn tiregen qonaqtardyń eń aldymen sáýleti men sáni kelisken «Áziret Sultan» meshitin zııarat etip, Ortalyq Azııa boıynsha teńdesi joq qulshylyq ordasyn tamashalaýǵa asyǵatyny aıtpasaq ta bolatyndaı. Budan bólek, kún saıyn «Áziret Sultan» meshitine aǵylǵan qala turǵyndarynyń da qatary jyl sanap artyp keledi. Osy oraıda, qonaqtardyń kóbisi derlik meshitpen tanysqan mereıli sátterin sýretke túsirip, estelik etip qaldyrǵysy keletini jasyryn emes.
Osyǵan baılanysty, Birinshi naıb múftı, «Áziret Sultan» meshitiniń Bas ımamy Naýryzbaı qajy Taǵanulynyń qoldaýymen Muslim.kz saıtynyń qyzmetkerleri qasıetti juma kúni qonaqtar úshin arnaıy joba bastap, qýanyshty sátterin sapaly sýretterge aınaldyrýdy qolǵa aldy. Ásirese, alystan kelgen qonaqtar úshin tıimdi bolǵan jobanyń alǵashqy kúni-aq fotograf aldynda kezekke turǵandar edáýir boldy.
Aıta keteıik, «Tegin fotosessııa» jobasy tek juma kúnderi 10.00 men 12.00. aralyǵynda ǵana júrgiziletin bolmaq. Túsirilgen sýretter Muslim.kz saıtynyń «FOTOGALEREIa» aıdarynda birden júktelip otyratyn bolady.
