Bas meshit esigi qaıta ashyldy (FOTO)

Elimizde jarııalanǵan tótenshe jaǵdaı jáne karantın rejımine oraı ýaqytsha jabyq turǵan qulshylyq ordalary búgin jamaǵatqa esikterin aıqara ashyp otyr. Arnaıy kezeńdik keste boıynsha búgin qazaq dalasyndaǵy myń jarymǵa jýyq qulshylyq ordasy sanıtarlyq talaptardy saqtaı otyryp, óz jumystaryn bastady.

Elimizdiń Bas qulshylyq ordasy «Áziret Sultan» meshiti de búgin jamaǵatqa aıqara esik ashty. Alyp ǵımarat ishi áp-sátte súıikti meshitterin ańsaǵan jamaǵat saǵynyshyna tunyp, qansha ýaqyt boıy qańyraǵandaı kúı keshken qulshylyq ordasyna jan bitkendeı boldy. Qandaı qıyn-qystaý kún týsa da, aýzynan Allasyn tastamaǵan halqymyzdyń qulshylyqqa qulshynyp, el amandyǵy úshin qol jaıyp, duǵa jasaýǵa asyqqany da búgingi kúnniń basty kórinisi boldy.

Ázirge bekitilgen ereje boıynsha meshitte jamaǵat namazy oqylmaıdy. Qulshylyq ordasy tańǵy 07:00 men keshki 20:00 aralyǵynda jumys isteıdi. Turǵyndardyń qaýipsizdigi maqsatynda bul shart erteńgi Qadir túninde de saqtalady. Sondaı-aq, meshitke kelýshi jamaǵattyń tómendegi talap-erejelerdi tolyqtaı bilgeni abzal.

Sýretterdi «FOTOGALEREIa» aıdarynan kóre alasyzdar!