BAS IMAMNYŃ QATYSÝYMEN QAIYRYMDYLYQ IS-ShARASY ÓTTI

Elordadaǵy «Ar-Rahman» meshitinde 35 otbasyǵa azyq-túlik berildi. Qaıyrymdylyq is-sharasyna Astana qalasynyń bas ımamy Nurbek qajy Áýeshanuly arnaıy qatysty. Bas ımam izgi istiń árdaıym jalǵasatynyn aıtyp, jaqsylyqqa ortaqtasqan jandarǵa rızashylyǵyn jetizdi.

«Bilesizder QMDB jumysynyń bir baǵyty qaıyrymdylyq. Osy rette Astana ókildigi Áziret Sultan meshitiniń uıymdastyrýymen ózderińizge syı-sııapat jasaǵaly otyrmyz. «Jaqsylyqtyń jaqsylyqtan basqa qaıtarymy bar ma?» dep «Ar-Rahman» súresinde baıandalǵandaı, shynynda jaqsylyqtyń qaıtarymy ‒ tek jaqsylyq qana. Quranda Alla Taǵala: «Jaqsylyqty yqylaspen isteýshilerdi qýandyr!» ‒ dep buıyrady. Izgi iske ortaqtasyp, bir jaǵy Sizderdiń batalaryńyzdy alaıyn dep arnaıy osy aýdanǵa kelip otyrmyn. Bizdiń shynaıy yqylasymyzdy qabyl alyńyzdar. Dál osy Ar Rahman meshitindegi qaıyrymdylyq is-sharamyzdy Zeket qory Astana ókildigi toqtatpaıdy. Árkez osylaı jaqsy iske sebepshi bolýymyzdy Alla násip etsin», - dedi bas ımam.

Aıta keteıik Astana ókildiginiń «Zeket jáne qaıyrymdylyq» qory Óndiris turǵyn alabynda ornalasqan «Ar-Rahman» meshiti jamaǵatyn árdaıym qýantyp keledi.