BAS IMAM «YRYSKELDI QAJY» MEShITINDE JAMAǴATPEN JÚZDESTI

Astana qalasynyń bas ımamy Nurbek qajy Áýeshanuly elordadaǵy «Yryskeldi qajy» meshitine arnaıy baryp, jamaǵatpen júzdesti. Bas ımam ekinti namazyn ótkizip, jınalǵan qaýymǵa taǵylymdy ýaǵyz aıtty.

Ýaǵyz barysynda Nurbek qajy Áýeshanuly ıslamdaǵy sálemdesýdiń mańyzyna toqtalyp, onyń adamdar arasyndaǵy tatýlyq pen baýyrmaldyqty nyǵaıtatyn asyl qundylyq ekenin jetkizdi. Ol Paıǵambarymyzdyń (oǵan Allanyń salaýaty men sálemi bolsyn) hadısterine súıene otyryp, sálem berý musylmannyń kórkem mineziniń belgisi ári úlken saýapqa jetkizetin amaldardyń biri ekenin atap ótti.

«Sálem – jaı ǵana amandasý emes, ol – duǵa, saýap jáne musylmandyqtyń aıqyn belgisi. Paıǵambarymyz (oǵan Allanyń salaýaty men sálemi bolsyn) sálemdi keńinen taratýdy musylmandar arasyndaǵy súıispenshilik pen baýyrmaldyqty arttyratyn amal retinde ósıet etken. Sondyqtan tanysaq ta, tanymasaq ta, birinshi bolyp sálem berýge asyǵaıyq. Sebebi sálem taraǵan jerde tatýlyq, ózara qurmet pen birlik ornyǵady. Al sálem joǵalǵan jerde salqyndyq pen alystaý paıda bolady», – dedi Nurbek qajy Áýeshanuly.

Sondaı-aq bas ımam jamaǵatty kórkem minezdi bolýǵa, qoǵamda ózara syılastyq pen izgilikti nasıhattaýǵa shaqyrdy. Ol musylmannyń ımany onyń adamdarmen qarym-qatynasynan, aınalasyna kórsetken qurmeti men yqylasynan kórinetinin atap ótti.

Kezdesý sońynda meshit aqsaqaldarymen el tynyshtyǵy, jurt amandyǵy, halqymyzdyń bereke-birligi men memleketimizdiń ósip-órkendeýi úshin duǵa jasalyp, izgi tilekter aıtyldy.

Источник: Aisha