BAS IMAM: «DINDI KÓRKEM JETKIZÝ – JAMAǴATTYŃ YQYLASYN ARTTYRADY»
Búgin qasıetti juma kúni Astana qalasynyń bas ımamy Nurbek qajy Áýeshanuly jumys saparymen Saryarqa aýdanyna bardy. Aýdandaǵy tórt meshittiń biri «Raqymqyzy Raısa ana» meshitiniń tynysymen tanysyp, jamaǵatpen júzdesti. Meshit ımamy Qalıjan qajy Zańqoev qulshylyq úıiniń jalpy tynys-tirshiligin baıandap ótti.
Keıin aýdan ımamdaryna arnalǵan jıynda Bas ımam negizinen Alla razylyǵyna aparatyn amaldar tóńireginde oı qozǵap, din qyzmetkerleriniń qazirgi qoǵamdaǵy jumysyn jetildiretin baǵyttar jaıynda aıtyp ótti.
«(Ýa, Muhammed!) Rabbyńnyń jolyna danalyqpen ári janǵa jaǵymdy ýaǵyz-nasıhat aıtý arqyly shaqyr! Sondaı-aq (Alla jolynda) kúresý (nemese sóz talastyrý) kerek bolǵanda árdaıym sóz ben is-árekettiń eń jaqsysyn tańda», – delingen Quranda («Nahyl» súresi, 125-aıat).
Dindi jetkizýde bilimmen qatar, sózdiń jumsaqtyǵy men adamnyń ádeptiligi de mańyzdy. Nasıhattyń maqsaty – jeńý emes, júrekti oıatý. Biz bireýdiń qateligin kórdik pe, ony aıyptamaıyq. Kerisinshe, Allaǵa jaqyndataıyq.
Paıǵambardyń nasıhat ádisi qalaı edi? Jumsaqtyqpen, kórkem minezben áreket etti. Nasıhat aıtqanda ár adamǵa sol adamnyń deńgeıinde aıtý kerek.
Jastarǵa – túsinikti til, senim. Aqsaqaldarǵa – qurmet. Zııaly qaýymǵa – dálel. Dinnen alystaǵan adamǵa – sabyr men janashyrlyq.
Keıin áleýmettik jelidegi nasıhat mádenıetine kóńil bóleıik. Maqsatymyz tanymal bolý emes, paıdaly bolý. Shynaıy yqylas, jaýapkershilik jáne kórkem ádeppen is qylatyn bolsaq, onda jetistikke jetemiz», – dedi bas ımam.
Kezdesý barysynda aýdandaǵy meshitterdiń jumysyn jetildirýge baǵyttalǵan birqatar usynystar aıtyldy. Qala bas ımamy mundaı kezdesýlerdiń paıdaly ári mańyzdy ekenin aıtyp, aýdan ımamdarynyń jumysyna sáttilik tiledi. Eske salaıyq búgingi kezdesýge Saryarqa aýdanyndaǵy tórt meshittiń ımamdary qatysty.
