Bas ımam ALQA radıosyna suhbat berdi
Búgin Astana qalasynyń bas ımamy Nurbek qajy Áýeshanuly elordadaǵy ALQA ınternet radıosyna arnaıy suhbat berdi.
Suhbat barysynda qasıetti Qurban aıt merekesiniń rýhanı mańyzy men qoǵamdaǵy orny keńinen sóz boldy.
Efır kezinde bas ımam Qurban aıttyń musylman jurtshylyǵy úshin baýyrmaldyq pen janashyrlyqty arttyratyn ulyq mereke ekenin atap ótip, qurbandyq shalýdyń sharıǵattaǵy orny men tárbıelik mánine toqtaldy. Sonymen qatar, onlaın qurbandyq shalý tártibi, elordadaǵy arnaıy qurban shalý oryndary, ysyrapqa jol bermeý, mal baǵasynyń turaqtylyǵy sekildi kópshilikti tolǵandyrǵan saýaldarǵa naqty jaýap berdi.
Nurbek qajy Áýeshanuly óz sózinde Qurban aıtta dańǵoılyq pen básekelestikke emes, shynaıy yqylasqa, muqtaj jandarǵa kómek kórsetý men qoǵamdaǵy birlikti nyǵaıtýǵa basymdyq berý qajettigin jetkizdi.
Suhbattan keıin bas ımam ALQA medıasynyń tynys-tirshiligimen tanysyp, ujymnyń aqparattyq-aǵartýshylyq baǵyttaǵy eńbegine oń baǵasyn berdi. Sondaı-aq, rýhanı qundylyqtardy nasıhattaýda medıa salasynyń mańyzy zor ekenin atap ótip, shyǵarmashylyq ujymǵa sáttilik tiledi.
