Baqyt Sultanov kópbalaly otbasylarǵa áleýmettik kómek kórsetý kún tártibindegi eń ózekti másele ekenin aıtty

Astana ákimi halyqqa esep berý kezdesýinde halyqtyń áleýmettik álsiz toptaryn qoldaýǵa basty nazar aýdardy, dep habarlaıdy Astana qalasy ákimdiginiń resmı saıty.

Baqyt Sultanovtyń aıtýynsha, Astana ákimdigine kópbalaly otbasylarǵa beriletin ataýly áleýmettik kómek máselesine qatysty kóptegen suraq túsedi. Áleýmettik qorǵaý –  ákimdik úshin aldyńǵy qatardaǵy basymdyqty mindet.

«Kópbalaly otbasylarǵa beriletin ataýly áleýmettik kómek – kún tártibindegi eń ózekti másele.  Naqty aqpar anyqtalyp jatyr. Qazirgi kúni esepteý ádistemesiniń erekshelikterine saı 10 myń osyndaı otbasynyń tek 4% (barlyǵy 434 otbasy) ǵana ataýly áleýmettik kómek alýda. Bul – óte tómen kórsetkish. Qansha qarajat bólingenmen, biz sol qarajatty tıesili jerge jetkize almaı otyrmyz. Bul sol otbasylarǵa bólingen qarajat qoı. Nege kerisinshe jaǵdaı týyndady? Máseleni qarastyryp anyqtadyq. Ol jerde qarapaıym adam túsine bermeıtin kóp másele bar. Qazir ol bizdiń basty mindetimiz bolyp otyr», dedi B. Sultanov. 

Bul rette ol atap ótkendeı, barlyq tirkelgen otbasy ózderine tıisti kómekti alý qajet. Al tirkelmegender tirkelýi kerek.

«Bul máseleni bizdiń aldymyzǵa Elbasy qoıyp otyr. Áleýmettik qorǵaý – bul basty mindet. Bul tek kópbalaly nemese az qamtylǵan otbasylarǵa ǵana emes, múgedekter, zeınetkerler, Uly Otan soǵysyna qatysýshylar men basqa da sanattaǵylarǵa qatysty », - dedi Sultanov.