BAQ ókilderi Bas meshittegi aýyzasharda bas qosty (FOTO)

Búgin respýblıkalyq «Áziret Sultan» meshitinde Elordamyzdaǵy jýrnalıster qaýymy qonaqta bolyp, «Berekeli Ramazan» dastarhanynan aýyz ashty.  Qazaq baspasóziniń qarymyn kúsheıtip, qalamdy qarý etken túrli telearnalar men gazet-jýrnal, saıt tilshileri bir dastarhan basynda bas qosyp, taǵylymdy otyrys ótkizdi. Kóbine túsirilim barysynda ǵana joldary túıisetin tilshiler qaýymy úshin meshittegi aýyzashardyń orny bólek bolǵandaı. «Áziret Sultan» meshitiniń konferents zalyna birtindep jıylǵan jýrnalısterdiń aýyzashar aldyndaǵy jyly júzdesýleri men dostyq suhbattary, dastarhan basyndaǵy bir atanyń balasyndaı jaqyndyq pen ortaq pikirler úndestigi osyny ańǵartqandaı.

Etene áriptesterimen emen-jarqyn suhbattasyp, bir jasap qalǵan jýrnalıster úshin meshit ımamynyń ýaǵyzy da shól qandyrar rýhanı sýsyn boldy. Qutty qonaqtarmen birge Ramazannyń 23-shi kúnine aıaq basqan «Áziret Sultan» meshitiniń naıb ımamy Baqytjan Ótkelbaev otyrys barysynda ulyq aıdyń qadir-qasıeti jaıynda taǵylymdy ýaǵyz aıtyp, tilshiler qaýymyn tyń oılarǵa jeteleı tústi. Quran qıssalarynan mysal keltire kelip, tilshiler qaýymy úshin artylar salmaqtyń da, júkteler mindettiń de qaı zamanda orasan ekenin áserli jetkizdi. Sondaı-aq, qolymyzdaǵy nyǵmettiń qadirin túsinip, baǵasyn bilýge úndegen Baqytjan ımamnyń bul ýaǵyzy da jýrnalıster úshin taǵylymǵa toly boldy.

Berekeli otyrys barysynda Bas redaktorlar klýbynyń prezıdenti Kenjebolat Joldybaı aǵamyz da kópshilikke ǵıbratty áńgime aıtyp, otyrys sánin arttyra tústi. Búgingi osyndaı taǵylymdy basqosýǵa uıytqy bolýǵa respýblıkalyq «Áziret Sultan» meshitine rızashylyǵyn bildirip, jyly lebizin jetkizdi.

Sýretter toptamasyn «FOTOGALEREIa» aıdarynan kóre alasyzdar!