«Áziret Sultan» ujymy jeńimpaz qyzmetkerin qarsy aldy (FOTO)

Osydan birneshe kún buryn Elorda ókildigi atynan Aqtaý qalasynda ótken IV Respýblıkalyq azanshylar jarysyna attanǵan Erlan Bazarbaıuly búgin syn sapardan júldeli oraldy. «Ádemi áýezdi azanshy» jarysynyń bas júldesin qanjyǵalaǵan úzdik azanshyny «Áziret Sultan» meshitiniń bas ımamy Erbolat Júsipov bastaǵan ujym arnaıy qarsy alyp, jeńimpazǵa laıyq syı-sııapat kórsetti.

Qazaqy dástúrimizge oraı júldeli oralǵan Erlan Bazarbaıulyna ujym atynan shapan jabylyp, quttyqtaý lebizderin bildirdi. Bas ımam Erbolat Júsipov: «Bul jeńis – tek seniń ǵana jetistigiń emes, Nur-Sultan ókildiginiń abyroı, maqtanyshy», – dep shynaıy baǵasyn berip, alǵysyn jetkizdi.

Aıta keteıik, Bıtenov Erlan Bazarbaıuly 2016 jyldan beri respýblıkalyq «Áziret Sultan» meshitiniń azanshysy bolyp qyzmet atqaryp keledi. 2010 jyly «Shymkent medresesinde» ımamdyq qyzmetten bastalǵan eńbek joly Almaty oblysyndaǵy «Iassaýı» oqý ortalyǵynda ustazdyqpen jalǵasyp, búgingi tańǵa deıin shákirtter tárbıeleý jumysyna kóp eńbek sińirgen. Sondaı-aq, 2009-2011 jyldary «Otyrar» ýnıversıtetinde Quran kýrsyn támamdap, qarı ataǵyna qol jetkizgen.