«Áziret Sultan» meshitiniń ustazy Taraz jamaǵatymen júzdesti (FOTO)

Respýblıkalyq «Áziret Sultan» meshitiniń ustazy, Respýblıkalyq aqparattyq nasıhat tobynyń (RANT) múshesi Maqsat Qaıyrǵalıev Jambyl oblysyna is-sapary aıasynda birqatar kezdesýler ótkizdi.

Nur-Sultan qalasynan arnaıy kelgen bilikti maman aldymen aımaqtaǵy «Hıbatýlla Tarazı» meshitinde jamaǵatpen júzdesip, erkin taqyrypta ýaǵyz júrgizdi. Maqsat Qaıyrǵalıev kópshiliktiń suranysy boıynsha qoǵamdaǵy túıtkildi máselelerdiń túıinin tarqatyp, sharıǵı turǵydan keńes aıtty. Sondaı-aq jamaǵattyń kókeıkesti saýaldaryna jaýap berildi.

Budan keıin RANT múshesi «Hıbatýlla Tarazı» medresesiniń stýdentterimen júzdesti. Maqsat Qaıyrǵalıev kózi ashyq, kókiregi oıaý jastardy beı-jaı qaldyrmaıtyn, oı túıerlik súbeli nasıhat aıtty. Jastarǵa basynan ótken oqıǵalardy aıtyp, din jolyndaǵy tájirıbesin bólisti. Motıvatsııa bererlik maǵlumattar aıtylǵan júzdesýden shákirtter mol azyq aldy.