«Áziret Sultan» meshitiniń málimdemesi
Elimizde jarııalanǵan tótenshe jaǵdaı rejıminiń aýyrtpalyǵy qazirgi tańda barsha otandastarymyzǵa ońaı tıip turǵan joq. Qımyl-qozǵalys shektelip, keıbir jumys túrleriniń múldem qysqaryp jatqany sııaqty jaıttardyń jurtshylyq arqasyn aıazdaı qaryp jatqany da jasyryn emes. El basyna osyndaı qıyn-qystaý kún týǵan shaqta memleket tarapynan uıymdastyrylyp jatqan áleýmettik kómekterdiń, qarjylaı qoldaýdyń mańyzy aıryqsha ekeni aıtpasa da túsinikti. Qazaq eliniń tuńǵysh prezıdenti N.Á.Nazarbaevtyń «Biz birgemiz» qaıyrymdylyq aktsııasyn jarııalaýy da, eń aldymen, el turǵyndarynyń arasyndaǵy birlik-berekeni nyǵaıtyp, halyq basyna túsken beınettiń júgin jeńildetýge baǵyttalǵan bolatyn.
Osy oraıda, Qazaqstan musylmandary dinı basqarmasy da ıgi sharaǵa ózindik ún qosyp, qaıyrymdylyq sharalary qataryn arttyra túsýdi kún tártibine shyǵarǵan edi. Sodan beri elimizdiń barlyq óńirlerinde túrli qaıyrymdylyq sharalary jıi uıymdastyrylyp, muqtaj otbasylarǵa múmkindiginshe járdem berilip keledi. Qasıetti Ramazan aıy esigimizden enisimen, bul ıgi sharalardyń aýqymy da artyp, kólemi de kóbeıip keledi.
Sondaı ıgi sharalardyń biri búgin respýblıkalyq «Áziret Sultan» meshitinde bolyp ótti. Qulshylyq ordasyna aldyn ala jazbasha túrde ótinish bildirgen muqtaj otbasylardyń tizimi túzilip, Elorda ókildiginiń uıytqy bolýymen 1000-ǵa jýyq muqtaj otbasyǵa azyq-túlik qory úlestirildi. Bas shahardaǵy qulshylyq ordalarynyń shákirtteri men jamaǵatynan quralǵan eriktiler toby arqyly azyq-túlik sómkeleri muqtaj jandarǵa tabystalyp, karantın erejelerine sáıkes taratý jáne jetkizip berý jumystary júrgizildi.
Degenmen, atalmysh oqıǵa áleýmettik jeli arqyly jeldeı tarap, «Áziret Sultan» meshitinde tegin azyq-túlik taratyp jatyr eken degen beısaýat aqparattyń arqasynda qulshylyq ordasyna qaraı aǵylǵan adamdar nópiri paıda bolyp otyr. Meshit mańaıyna toptasyp, tegin azyq-túlikten quralaqan qalmaıyn degen jandardyń býynsyz jerge pyshaq uryp, karantın erejelerin de saqtamaǵany qynjyltady.
Osy oraıda, respýblıkalyq «Áziret Sultan» meshiti resmı túrde qaıyrymdylyq sharasynyń aıaqtalǵanyn, josparlanǵan meje boıynsha azyq-túlik sómkeleriniń túgeldeı taratylyp bitkenin habarlaıdy. Aldaǵy ýaqytta mundaı qaıyrymdylyq sharalary aldyn ala aıtylyp, arnaıy túzilgen tizimdegi jandarǵa habar beriletinin eskertemiz!
