«Áziret Sultan» meshitiniń kilemderi aýystyryldy (FOTO)
Qazaqstannyń Tuńǵysh Prezıdenti – Elbasy Nursultan Nazarbaevtyń bastamasymen salynǵan respýblıkalyq «Áziret Sultan» meshitiniń kilemderi aýystyryldy.
El astanasynyń rýhanı ortalyǵyna aınalǵan qulshylyq ordasynyń ashylǵanyna bıyl 8 jyl. Meshittiń jaınamaz kilemi osy ýaqyt aralyǵynda qanshama musylmanǵa qyzmet kórsetti. Sodan bolar keıingi kezderi túsi óńip, bastapqy reńin joǵalta bastady. Osyǵan baılanysty QMDB Tóraǵasy, Bas múftı Naýryzbaı qajy Taǵanulynyń bastamasymen meshittiń óńin ashyp, shyraıyn kirgizý maqsatynda kilemderin aýystyrý jaıly sheshim qabyldandy.
Meshit kilemin aýystyrý jaıly bastama meshitte qulshylyq jasap, rýhanı ilim úırenýge keletin qalyń buqaranyń ıgiligi úshin qolǵa alyndy. Meshitti jańa kilemmen jabdyqtaýǵa dinge janashyr demeýshiler kómek kórsetti. Jalpy kólemi 9800 sharshy metr bolatyn aspan tústes kók kilem meshit qabyrǵasyndaǵy oıý-órnekter túsimen de úılesim tapty. Kilemder Túrkııanyń Manısa qalasynda ornalasqan «Ismaıyl Haskýl haly» kompanııasynyń fabrıkasynda 25 kún ishinde qoı júninen toqyldy. Tapsyrysty túrkııalyq «Qurylys Inshaat Sembol» kompanııasy oryndady.
Al «Áziret Sultan» meshitiniń burynǵy kilemderi men arnaıy tósenishteri aımaqtardaǵy 30 meshitke tábárik retinde taratyldy. Qazaqta el basqarǵan han-sultandardyń, sózi salmaqty abyz aqsaqaldardyń, aqyly kenish abzal analardyń tutynǵan buıymdaryn keıingi urpaqqa tábárik retinde taratatyn jaqsy dástúri boldy. «Áziret Sultan» meshitiniń burynǵy kilemderi de osyndaı ıgi maqsatta basqa meshitterge úlestirildi.
Sýretterdi «FOTOGALEREIa» aıdarynan kóre alasyzdar!
